Қўриқлаш бошқармаси Миллий гвардиядан ИИВга ўтказилди
ИИВ ҳузуридаги Қўриқлаш департаментига янги бошлиқ тайинланди.
Миллий гвардия Қўриқлаш бош бошқармаси Ички ишлар вазирлиги ҳузуридаги Қўриқлаш департаменти этиб қайта ташкил этилган.
28 ноябр куни “Ички ишлар органларининг қўриқлаш соҳасидаги фаолиятини амарали ташкил этиш чора-тадбирлари тўғрисида”ги Президент қарори имзоланган.
Президентнинг тегишли фармойиши билан ИИВ ҳузуридаги Қўриқлаш департаменти бошлиғи вазифасини бажарувчи этиб полковник Шодибеков Қобил Адилович тайинланган. Тайинловга қадар у Тошкент шаҳар Қўриқлаш бошқармаси бошлиғи лавозимида фаолият юритган.
Қарорга кўра, департамент ва унинг бўлинмалари зиммасига қуйидаги асосий вазифалар юклатилади:
- шартнома асосида давлат, ўта муҳим, тоифаланган ва бошқа объектлар, таълим муассасалари, жисмоний ва юридик шахсларнинг мол-мулки, савдо, хизмат кўрсатиш, кўнгилочар ва қурилиш объектларини замонавий усуллар орқали қўриқлаш;
- қўриқланаётган объектларда ички тартиб ва назорат ўтказиш режимларини таъминлаш;
- қўриқлаш фаолиятига замонавий ахборот-коммуникация ва сунъий интеллект технологияларини кенг жорий этиш.
2026 йил 1 январдан қўриқловга олинган банклар, йирик ишлаб чиқариш корхоналари, маҳаллий ҳокимликлар ва бошқа объектларнинг фуқаролар кириш ва чиқиш жойларига босқичма-босқич шахснинг юзини таниб олиш имкониятига эга техник воситалар ўрнатилади.