Трамп Украина можароси тез орада тугаши мумкинлигини эълон қилди
Россия ва Украина делегациялари Абу-Дабида тинчлик ўрнатиш бўйича тўғридан-тўғри музокаралар олиб бориши ҳам хабар қилинган.
АҚШ президенти Доналд Трамп Россия-Украина можаросини ҳал қилиш бўйича келишувга оз қолганини эълон қилди.
"Менимча, биз келишувга жуда яқинмиз. Биз буни ҳал қиламиз", деди Трамп Оқ уй ҳовлисида журналистларга Шукрона куни олдидан анъанавий маросимда сўзлаган нутқида (Clash Report иқтибос келтирган).
Аввалроқ Axios ўз манбасига таяниб, Россия ва Украина делегациялари Абу-Дабида тинчлик ўрнатиш бўйича тўғридан-тўғри музокаралар олиб боришини хабар қилганди. Россия президенти матбуот котиби Дмитрий Песков бу борадаги хабарларни кузатиб бораётганини айтди, аммо учрашувни аниқ тасдиқламади.
Украина президенти девони раҳбари Андрий Ермак бугун Доналд Трамп ва унинг украиналик ҳамкасби Владимир Зеленский ўртасида келишувни якунлаш учун 27 ноябр куни учрашув бўлиб ўтиши мумкинлигини эълон қилди.
Унинг сўзларига кўра, асл тинчлик режаси 28 пунктдан 19 пунктгача қисқартирилди, асосий келишмовчиликлар ҳудудий масалаларга қаратилган.
Эслатиб ўтамиз, Трамп тинчлик режаси сўнгги вақтларда энг кўп муҳокама қилинмоқда.
Аввалроқ АҚШ, Украина ва Европа расмийлари Женевада учрашганди.
Улар тинчлик режаси бўйича музокараларни бошлашган. Ушбу режада Россияга ён босилган дея даъво қилинганди.