АҚШ, Украина ва Европа расмийлари Женевада учрашди

АҚШ, Украина ва Европа расмийлари тинчлик режаси бўйича музокаралар учун Женевада учрашди.

Бу учрашув Украина ва унинг иттифоқчилари мазкур ҳужжатда Россияга ён босадиган бандлар бор деб даъво қилганидан сўнг ўтказилди.

21 ноябр куни АҚШ президенти Доналд Трамп Украина президенти Владимир Зеленскийга ушбу 28 банддан иборат режани маъқуллаш учун 27 ноябргача вақт борлигини айтди. Режада Украина ҳудудининг бир қисмини бериши, ҳарбий кучларини чеклаши ва НАТОга қўшилиш бўйича ҳаракатлардан воз кечиши талаб қилинади.

Кўплаб украиналиклар, жумладан, фронт чизиғида жанг қилаётган аскарлар учун бундай шартлар деярли тўрт йиллик жанглардан сўнг таслим бўлиш билан баробар ҳисобланади. Трамп урушни тугатиш бўйича ҳозирги таклиф унинг якуний таклифи эмаслигини маълум қилди.

Тинчлик режаси эълон қилинганидан бери уни ким тузишда иштирок этгани борасида кўплаб тушунмовчиликлар юзага келди. Европалик иттифоқчилар улар билан маслаҳатлашилмаганини билдирди.

Женевада расмийлар йиғилар экан, Германия канцлери Фридрих Мерц мақсад Украина қабул қилиши мумкин бўлган ва Россия билан музокараларда қўлланиши мумкин бўлган режа ишлаб чиқиш кераклигини айтди. Бу вақт талаб қилади, деб қўшимча қилди у.

"Президент Трамп яқин кунларда хоҳлаган ечимга эришамиз деганига ишончим комил эмас", деди Мерц Йоханнесбургдаги G20 йиғилишида.

Женевага йўл олишдан олдин, АҚШ давлат котиби Марко Рубио Х ижтимоий тармоғида Вашингтон ушбу режани ўзи ишлаб чиққанини таъкидлади.

Полша бош вазири Доналд Туск Х платформасида Украина иттифоқчилари режани ишлаб чиқишга тайёр эканини, аммо унинг қандай яратилгани муҳим эканини айтди.

Рубио ва АҚШнинг махсус вакили Стив Уиткофф якшанба куни шошилинч тарзда Женева учрашувига етиб келишди. “Биз якуний тафсилотларни аниқлаб олишга ва Украинага қулай бўлган келишув лойиҳасини тайёрлашга умид қиламиз,” деди АҚШ расмийси. “Икки президент учрашмагунча ҳеч нарса келишилмайди,” деди у, Трамп ва Зеленскийга ишора қилиб.

Зеленский Женевадаги дипломатик саъй-ҳаракатларни мамнуният билан кутиб олди ва уларнинг натижа беришига умид билдирди. Учрашувдан олдин АҚШ ва Украина расмийлари ўртасида конструктив музокаралар бўлиб ўтди.

Туркия президенти Ражаб Тоййип Эрдўғон душанба куни Россия президенти Владимир Путин билан Украина масаласида гаплашишини ва натижаларини Европа ҳамда АҚШ иттифоқчилари билан бўлишишини айтди.

Украина учун хавфли палла

Россиянинг кўплаб асосий талабларини ўз ичига олган ва Украинага фақат хавфсизлик кафолатларини ноаниқ тарзда таклиф қиладиган ушбу лойиҳа мамлакат учун ниҳоятда хавфли бир даврда пайдо бўлди.