"Мен уни қўллаб-қувватлайман": Трамп ва Мамданининг кутилмаган дўстона учрашувидан асосий хулосалар

АҚШ президенти Доналд Трамп Оқ уйда Ню-Йорк шаҳрининг янги сайланган мэри Зоҳран Мамдани билан учрашди.

Бу учрашув йилнинг энг катта сиёсий тўқнашуви сифатида тақдим этилган эди, бироқ бунинг ўрнига мақтовларга тўла учрашувга айланди.

Ўзининг сайловдаги ғалаба нутқида ўзини “демократик социалист” деб танитган мэр Трампни “золим” деб атаган эди. Ва кечагу учрашувдан олдин президентнинг матбуот котиби Мамданининг ташрифини “Оқ Уйга келаётган коммунист” деб таърифлаган эди.

Учрашув давомида улар Ню-Йорк шаҳридаги яшаш нархларининг қимматлиги муаммосини ҳал қилишдаги кераклигини таъкидлашди.

Кўпчилик Трамп Мамданига "ҳужум қилиш"ини кутаётганди, бироқ у Мамданини бир неча бор мақтади. Учрашув бошланиши биланоқ, Трамп Мамданини мақтаб бошлади. Президент Мамдани жуда яхши мэр бўлишига умидвор эканлигини таъкидлади.

Кейинроқ Трамп: “У жуда яхши иш қила олади, бунга ишончим комил,” деб қўшимча қилди.

Мамдани ва Трампнинг умумий жиҳатлари бор: иккаласи ҳам ню-йорклик, ва иккаласи ҳам Қуеэнс туманини ўз уйларидек билишган.

Трампнинг болалик уйи Jamaica Estates маҳалласида жойлашган бўлса, Мамдани ҳозирда Астория ҳудудида яшайди. Иккаласи ҳам шаҳарни жонидан ортиқ севишларини айтиб ўтишди. Трамп матбуот анжумани давомида туғилган шаҳри ҳақида меҳр билан гапирди.

"Агар ҳаммаси Мамдани режалаштирганидек бўлса, бу шаҳар ажойиб бўлиб кетади ва мен бундан жуда ҳам хурсанд бўламан" — деди Трамп. Бир пайтлар Трампнинг ўзи ҳам сиёсий ҳаётининг бошқа даврида Ню-Йорк мери бўлишни хоҳлаганини айтиб ўтди.

Трамп ўтган йили қайта сайланишга эришган, у 2024 йилда сайловчиларни ғазаблантирган юқори инфляция масаласини тинимсиз кўтарганди. Аҳоли озиқ-овқат, уй-жой ва бошқа зарур эҳтиёжлар нархидан чарчаб борар экан, Трамп иқтисодий барқарорликка эришиш ҳақида фикр билдирди.

Ню-Йоркдаги сайлов кампанияси давомида Мамдани ҳам арзон уй-жой етишмаслигига қатъий эътибор қаратиб, баъзи ижара нархлари тартибга солинган квартираларда ижара нархлари оширилишини музлатиб қўйиш ташаббусини илгари сурган эди.

Мамдани Трамп билан ню-йоркликларга арзон яшаш шароитини яратиш йўлларини муҳокама қилганини айтди.

Уларнинг қарашларидаги фарқлар ҳақида савол берилганида, сайланган мер суҳбатни яна шу мавзуга қайтарди. Яқин Шарқда тинчликка эришиш борасидаги қарашлар фарқи ҳақидаги саволга жавоб берар экан, Мамдани Трампни тарафдорлари ундан абадий урушларга барҳам берадиган ва сиёсий инқирозларни ҳал қиладиган шахс сифатида қарашларини айтиб ўтди.

Ҳуқуқни муҳофаза қилиш ва иммиграция масалаларида ҳам улар маълум умумий нуқталарни топгандек кўринди. Мамдани Трамп билан Ню-Йоркдаги федерал иммиграция назорати операцияларини муҳокама қилганини ва аҳоли бу масала борасида хавотирда эканлигини айтди. Бироқ Трамп улар иммиграциядан кўра жиноятчилик ҳақида кўпроқ гаплашганини таъкидлади.

"У шаҳарда жиноятлар бўлишини истамайди, мен ҳам жиноятчиликка ўта қаршиман" — деди президент. Бу борада улар яхши тил топишиб кетишларини қўшимча қилди.

Трамп ҳатто Мамдани мерлиги остидаги Ню-Йоркда яшашни хоҳлашини ва у ерда ўзини хавфсиз ҳис қилишини айтди.