Юз мингта "Кобалт"нинг учдан бири ҳам сотилмади

UzAuto Motors компанияси аввал шартнома қилинган, аммо пули тўланмаган 70 мингдан ортиқ Cobalt автомобилини қайта сотиш учун дилерларга топширишини билдирган. Шунда шартнома тасдиқланган 100 минг дона машинадан фақат 20 833 донаси учун тўлов амалга оширилган. Шартнома шартларига мувофиқ, 7 кун ичида тўлов амалга оширилмаган шартномалар бекор қилинган.

Компания автомобилларни дилерлар орқали сотиш қарорини шартнома тузиш жараёни якунланганидан кейин келиб тушган мурожаатлар сонининг кўплиги билан изоҳлаган.

"Онлайн-контрактация якунлангандан сўнг, компанияга кўплаб мижозлардан шартнома тузиш бўйича мурожаатлар келиб тушаётгани, шунингдек 3 ноябрь куни тузилган кўплаб шартномаларнинг аслида автомобилга бўлган ҳақиқий эҳтиёжсиз расмийлаштирилгани инобатга олиниб, UzAuto Motors тўлов муддати тугагач Chevrolet Cobalt автомобилларини расмий дилерлар салонларида сотишни бошлашга қарор қилди", дейилган хабарда.

Шунингдек, компания энди мижозлар исталган Chevrolet расмий дилеридан Cobalt автомобилини сотиб олиши мумкинлигини айтган. Яъни онлайн савдо эмас, оффлайн олди-сотди бошланади.

Дилерлик марказларида сотилаётган барча автомобиллар UzAuto Motors ягона тизими орқали расмийлаштирилади. Ҳар бир шартномада унинг ҳақиқийлигини тасдиқловчи QR код мавжуд бўлади.

Ҳозир компания янги Cobalt Style MCM моделини 156 млн 100 минг сўм, Cobalt Midnight MCM машинасини 165 млн 200 минг сўм нархда сотмоқда.