ЖЧ чипталарини сотиб олган мухлисларнинг виза суҳбатлари тезлаштирилади
АҚШ Давлат котиби Марко Рубио маъмурият виза беришда ёрдам учун бутун дунё бўйлаб 400 дан ортиқ қўшимча консуллик ходимларини юборганини билдирди.
Трамп маъмурияти FIFA Pass дастурини жорий этмоқда, бу футбол мухлисларига АҚШ виза аризаларини кўриб чиқишни тезлаштиришга ёрдам беради. Бу ҳақда NBC телеканали хабар берди.
FIFA Pass дастури ФИФА орқали Жаҳон чемпионати чипталарини сотиб олганларга суҳбатларини тезлаштириш ва АҚШ сайёҳлик визасини олиш имконини беради.
"Агар сизда Жаҳон чемпионати чиптаси бўлса, визани устуворлик асосида буюртма қилишингиз мумкин", деди душанба куни Овал кабинетда Трамп билан янги тизимни тушунтириш учун учрашган ФИФА президенти Жанни Инфантино.
АҚШ Давлат котиби Марко Рубио маъмурият виза беришда ёрдам бериш учун бутун дунё бўйлаб 400 дан ортиқ қўшимча консуллик ходимларини юборганини ва дунё мамлакатларининг тахминан 80% фуқаролари 60 кун ичида визаларни буюртма қила олишларини айтди.
Келаси йилги Канада, Мексика ва Қўшма Штатларда бўлиб ўтадиган Жаҳон чемпионати давомида жами 104 та ўйин бўлиб ўтади. Унда Ўзбекистон ҳам иштирок этади.
Трамп Жаҳон чемпионатини ўтказишни ўзининг устувор вазифаси қилиб белгилаган.
Илгари 2026 йилги ФИФА Жаҳон чемпионати учун аллақачон миллиондан ортиқ чипталар сотилгани ҳақида хабар берилган.