Хитойда сўнгги 70 йилликдаги энг йирик олтин кони топилди

Хитойда 1949 йилдан бери мамлакатдаги энг йирик олтин кони Лиаонинг вилоятида аниқланди. Тахминан 1444 тонна захирага эга бўлган бу кашфиёт олтин нархлари рекорд даражага чиққан бир пайтда юз берди.

Хитой табиий ресурслар вазирлиги 14 ноябр куни бу ҳақда маълум қилди. Бу Хитой Халқ Республикаси ташкил топганидан бери қайд этилган энг йирик якка олтин кони ҳисобланади. Расмийларнинг айтишича, ҳудудда умумий 2,586 миллион тонна рудага эга захира мавжуд бўлиб, ҳар бир тоннада ўртача 0,56 грамм олтин бор. Бу эса қарийб 1444 тонна соф олтинни ташкил этади.

Ҳозирги нархлар бўйича бу ҳажмдаги олтин 166 миллиард евродан кўпроқ қийматга эга. Олтин нархи бу йил рекорд даражага чиқиб, килограмми 115 000 евродан ошди.

Конга мингга яқин техник ходим ва ишчи жалб этилган. Бундай улкан конни излаб топиш одатда узоқ давом этишига қарамай, тадқиқот атиги 15 ойда якунланган.

Вазирлик конни “ултра-йирик”, аммо нисбатан паст сифатли деб таърифлади ва у дастлабки иқтисодий баҳолашдан аллақачон ўтганини билдирди.

Шу билан бирга, ҳукумат коннинг аниқ жойлашувини ошкор этмади. Фақат унинг Лиаонинг шарқий қисмида жойлашгани айтилди.

Бу кашфиёт олтин талабининг кескин ошган даврига тўғри келмоқда. Нархлар йил бошидан бери 50% дан кўпроққа кўтарилди — бунга заифлашаётган доллар, геосиёсий тангликлар кучаяётган мамлакатларнинг марказий банклари захираларни мустаҳкамлаш мақсадида кўп миқдорда олтин сотиб олиши сабаб бўлмоқда.

Хитой сўнгги йилларда минерал қидирув ишларини жадаллаштирган. 2024 йилда расмийлар Хунан вилоятида 1 000 тоннадан ортиқ олтин кони ва октябр ойида Гансу вилоятида 40 тоннадан зиёд кон топилганини билдирган эди. Мамлакат 2024 йилда 377,24 тонна олтин ишлаб чиқарди — бу ўтган йилга нисбатан 0,56% кўпдир.

Ички истеъмол эса 2024 йилда 985,31 тоннага етди. Олтин қуймалари ва тангаларига талаб бир йил ичида 24% дан кўпроққа ошди. Мутахассисларнинг айтишича, бу ҳолат Хитойда ўрта синфнинг кенгайиши ва глобал иқтисодий ноаниқликлар фонида жамғармани асраб қолиш истаги кучайганини кўрсатади. Шу боис олтин мамлакат бўйлаб тобора оммалашиб бораётган “хавфсиз актив”га айланмоқда.