Apple Google билан катта келишувга эришишга яқин турибди

Apple Googleʼга йилига қарийб 1 миллиард доллар тўлаш бўйича келишувга яқинлашмоқда.

Google'нинг Gemini сунъий интеллект модели асосида тайёрланган махсус версия Siri'нинг янги авлодини кучайтириш учун ишлатилади.

Бу қадам Apple учун жуда катта ўзгариш бўлади. Чунки компания одатда фақат ўз технологияларига таяниб келган, бироқ ҳозирча ўз сунъий интеллекти етарлича кучли бўлмагани сабаб Google'нинг моделидан вақтинчалик ечим сифатида фойдаланмоқчи. Бу модел Siri учун ишлаб чиқилаётган янги функцияларни ҳам қўллаб-қувватлайди.

Google яратган махсус сунъий интеллект модели 1,2 триллион параметрга эга бўлади ва бу унинг мураккаблиги ва имкониятларини кўрсатади. Таққослаш учун, Apple Intelligence'нинг ҳозирги булутга боғланган версияси 150 миллиард параметрга эга. Демак, Google модели билан Apple'нинг янги Siri модели олдингисидан қарийб 8 баравар кучлироқ бўлади.

Apple ушбу йил бошида OpenAI ва Anthropisнинг AI моделлари ҳақида ҳам ўйлаб кўрган эди. Учала компаниянинг модельлари синовдан ўтказилгач, Apple Google билан давом этишни маъқул топди.

Bloomberg нашрининг маълумотларига кўра, янгиланган Siri келаси йил баҳорида тақдим этилиши кутилмоқда. Бироқ ҳали бир неча ой вақт борлиги сабабли, бу режаларда ўзгаришлар бўлиши ҳам мумкин.