Доналд Трамп Путинга бўлган сиёсатини кескин ўзгартирди
Венгрияда бўлиб ўтиши кутилаётган учрашув бекор қилинди, Россия йирик компаниялари санкцияга учради.
АҚШ президенти Доналд Трамп Россия президенти Владимир Путин билан учрашувни бекор қилди ва янги санкцияларни эълон қилди.
Доналд Трамп Вашингтонда НАТО бош котиби Марк Рютте билан учрашди. Музокаралар чоғида Трамп Россия президенти Владимир Путин билан Будапештда бўлиб ўтиши керак бўлган аввалроқ режалаштирилган учрашувни бекор қилганини маълум қилди.
Америка раҳбарининг сўзларига кўра, бу қарорга музокараларда истиқбол йўқлиги сабаб бўлган:
"Мен хоҳлаган натижага эриша олмаганимизни ҳис қилдим. Владимир билан ҳар бир суҳбат яхши таассурот қолдиради, лекин ҳеч нарса амалга ошмайди".
Трамп келажакда ҳам шундай учрашув бўлишини истисно этмади.
Шу билан бирга, АҚШ Молия вазирлиги Роснефт, Лукойл нефт компаниялари ва уларнинг шўба корхоналарига қарши янги санкцияларни эълон қилди. Департаментнинг таъкидлашича, бу "Россиянинг тинчлик жараёнига жиддий қизиқиш билдирмаслиги" билан боғлиқ.
Трампнинг Марк Рютте билан учрашувидаги асосий баёнотлари:
- Трампнинг фикрича, Россия бутун Украина устидан назорат ўрнатишга интилмоқда.
- Вашингтон НАТО давлатларига қурол сотади, лекин Украинага эмас.
- Украина, Трампнинг сўзларига кўра, Россияга чуқур зарбалар бериш учун фақат Европа ракеталаридан фойдаланмоқда.
- АҚШ президенти можаро томонларини “олдинги чизиқдаги позицияларини тўғрилаб, ҳарбий ҳаракатларни тўхтатишга” чақирди.
- Трамп Россияга қарши янги санкциялар “узоқ давом этмаслигига” умид билдирди.
- Хитой етакчиси Си Цзинпин можарони ҳал қилишда муҳим рол ўйнаши мумкин.