Сурхондарёда қурилиш ва уй-жой коммунал хўжалиги бўлими бошлиғи ушланди
У шеригидан қурилиши тугалланмаган нотурар бино лойиҳа ҳужжатларини ўтказиб бериш эвазига пул олаётганда қўлга тушди.
Сурхондарё вилоятида қурилиш соҳасида фирибгарлик ҳолати аниқланди
Қурилиш ишларини лойиҳалаштиришга ихтисослашган МЧЖ архитектори Музработ туманида яшовчи фуқаронинг ишончига кирган ҳолда, унга қарашли бўлган, қурилиши тугалланмаган нотурар бино лойиҳа ҳужжатларини тегишли ташкилотлардан “муаммосиз” ўтказиб бериш эвазига фирибгарлик йўли билан 17 млн. сўм талаб қилган.
ДХХ ва ички ишлар органлари ҳамкорлигида ўтказилган тезкор тадбирда у сўралган пул маблағини олган вақтида ашёвий далиллар билан ушланди.
Шундан сўнг, тезкор тадбир давом эттирилиб, архитектор 17 млн сўмдан 1 млн сўмини Музработ туман қурилиш ва уй-жой коммунал хўжалиги бўлими бошлиғига бериши кераклиги маълум бўлиб, мазкур мансабдор ҳам ушбу пул маблағини олган вақтида ушланди.
Ҳозирда уларга нисбатан жиноят иши қўзғатилиб, тергов ҳаракатлари олиб борилмоқда.
Аввалроқ Навоийда Фавқулодда вазиятлар бўлими бошлиғи қўлга олинганди.
Шунингдек, Сурхондарёда туман Мажбурий ижро бўлими бошлиғининг ўринбосари ва давлат ижрочиси, Тошкентда эса адвокатлар ушланган.