Исроил ва ҲАМАС тинчлик режасининг биринчи босқичига рози бўлди
Бу ҳақда АҚШ президенти Доналд Трамп эълон қилди. Мазкур қадам Ғазода узоқ кутилган тинчлик учун муҳим қадам бўлиши мумкин.
АҚШ президенти Доналд Трамп Исроил ва ҲАМАС тинчлик режасининг биринчи босқичига рози бўлганини эълон қилди.
"Мен Исроил ва ХАМАС тинчлик режамизнинг биринчи босқичини имзолаганини эълон қилишдан ғурурланаман. Бу дегани, барча гаровга олинганлар тез орада озод қилинади ва кучли, узоқ муддатли ва абадий тинчлик сари биринчи қадамлар сифатида Исроил ўз кучларини келишилган чизиққа олиб чиқади", - деб ёзди у ўзининг Truth Social саҳифасида.
“Бу араб ва мусулмон дунёси, Исроил, барча қўшни давлатларимиз ва АҚШ учун буюк кун ва биз бу тарихий ва мисли кўрилмаган воқеани амалга оширишда биз билан бирга ишлаган Қатар, Миср ва Туркия воситачиларига миннатдорчилик билдирамиз”, — дея қўшимча қилди Трамп.
8 октябр куни Трампнинг махсус вакили Стив Уиткофф ва АҚШ президентининг куёви Жаред Кушнер Ғазо бўйича тинчлик музокараларига қўшилди. Мисрнинг Шарм ал-Шайх шаҳрида бўлиб ўтган маслаҳатлашувларда Қатар бош вазири ва Туркия разведкаси раҳбари ҳам иштирок этди.
ОАВ хабарларига кўра, исроиллик гаровга олинганларни ХАМАС асирлигидан озод қилиш 13 октябр куни бошланиши мумкин.
Ундан олдин Исроил ҳукумати Ғазо келишувининг биринчи босқичини тасдиқлаши керак. Исроил Бош вазири Бенямин Нетаняху Вазирлар маҳкамаси кенгашини тез орада чақириш ниятида эканини маълум қилди. Бу бугун содир бўлиши кутилмоқда.
Музокарадаги воситачилар Исроил ва ҲАМАС ҳам Ғазога гуманитар ёрдам киришига рози бўлганини эълон қилди. Бирлашган Миллатлар Ташкилоти Бош котиби Антониу Гутерриш БМТ ёрдамни кўпайтиришини ва Ғазони қайта қуриш бўйича саъй-ҳаракатларни кучайтиришини айтди. У барча томонларни келишув шартларига риоя қилишга чақирди, жумладан, исроиллик гаровга олинганларни озод қилиш, доимий ўт очишни тўхтатиш ва Ғазога гуманитар ёрдам олиб киришга зудлик билан рухсат бериш.
Фаластинлик юқори мартабали мулозим Би-би-си билан суҳбатда сулҳ Исроил ҳукумати маъқуллагандан сўнг дарҳол кучга киришини айтди.
Унинг сўзларига кўра, Исроил дастлабки беш кун давомида ҳар куни Ғазога гуманитар ёрдам олиб кетаётган 400 юк машинасига рухсат беради, кейинги кунларда эса бу рақам аста-секин ўсиб боради.