Трамп Pfizer билан йирик келишувга эришди

АҚШ президенти Доналд Трамп мамлакатда дори-дармон нархини пасайтириш бўйича муҳим режани эълон қилди. Бу ҳақда CNN телеканали хабар берди.

У америкаликлар дори-дармонларни чегирма билан сотиб олишлари мумкин бўлган TrumpRx тўғридан-тўғри онлайн-дўконини ишга туширди, шунингдек, Pfizer фармацевтика компанияси билан кўплаб маҳсулотлар нархини пасайтириш бўйича келишувга эришди.

Трамп, Қўшма Штатлар "дунёдаги соғлиқни сақлаш тизимини энди субсидия қилмаслигини" эълон қилди.

Pfizer АҚШ президентнинг барча талабларига рози бўлган биринчи компания бўлди. У дори-дармонларни "энг қулай давлат тамойили" асосида сотади - бу ҳамкор мамлакатларда мавжуд бўлган энг паст нархлар бўлади.

Кўпгина бирламчи тиббий ёрдам дори-дармонлари ва баъзи бир маркали дорилар TrumpRxʼда ўртача 50% чегирма билан сотилади. Бунинг эвазига компания фармацевтика импорти бўйича маълум тарифлардан уч йил муддатга озод қилинади ва Қўшма Штатлардаги тадқиқот ва ишлаб чиқаришга қўшимча 70 миллиард доллар сармоя киритади.

Бу ташаббус америкаликлар дори-дармонлар учун бошқа ривожланган мамлакатлар аҳолисига қараганда қарийб уч баравар кўпроқ пул тўлагани сабабли пайдо бўлди. Май ойида Трамп фармацевтика компанияларидан америкалик беморларга "энг қулай давлат" (MFN) нархларини таклиф қилишни талаб қилувчи фармон чиқарди. Июл ойида у 17 та йирик фармацевтика компаниясининг бош директорларига талаблар рўйхати ва муддат (29 сентябр) кўрсатилган хатлар юборди.

Бироқ, CNN томонидан келтирилган экспертлар бу чораларнинг самарадорлигига шубҳа қилмоқда. Президент компанияларни бундай нархларни белгилашга мажбурлаш учун қонуний ваколатга эга эмас. Баъзи экспертларнинг фикрича, фармацевтика компаниялари АҚШда нархларни пасайтиришдан кўра, бошқа мамлакатларда нархларни кўтариш эҳтимоли кўпроқ.

Трамп дори нархларини 1500 фоизга пасайтиришга ваъда берди, экспертлар буни математик жиҳатдан имконсиз дейишади. Фармацевтика саноати MFN кўрсатмалари жиддий оқибатларга олиб келиши ва Американинг саноатдаги етакчилигига путур этказиши мумкинлиги ҳақида огоҳлантиради.

Аввалроқ Трамп АҚШда ишламоқчи бўлган хорижликлар учун 100 минг доллардан пул ундириш бўйича фармонни имзолаганди.

Бу H-1B ишчи визасига тааллуқли. Катта тўлов сабаб компаниялар хорижликларни ишга олмаслиги мумкин.