Ўзбекистон ва Озарбайжон U-20 жаҳон чемпионатига мезбонлик қилади
Бу ҳақда ФИФА Кенгашининг навбатдаги йиғилишида қарор қилинди. Бир йил аввал Ўзбекистонда футзал бўйича жаҳон чемпионати ташкил этилганди.
Ўзбекистон ва Озарбайжон 2027 йилги ФИФА U-20 Жаҳон чемпионатига мезбонлик қилади. Бу ҳақда ЎФА хабар берди.
Бугун ФИФА Кенгашининг навбатдаги йиғилиши бўлиб ўтди. Йиғилишда кун тартибидан ўрин олган муҳим масалалар қаторида 2027 йилги 20 ёшгача футболчилар ўртасидаги ФИФА Жаҳон чемпионати мезбонлари аниқланди.
Унга кўра, Ўзбекистон ва Озарбайжон биргаликда ёшлар ўртасидаги мундиалга мезбонлик қилиши белгиланди. Мазкур мусобақа ФИФА томонидан ўтказиладиган миллий терма жамоалар ўртасидаги Жаҳон чемпионатидан кейинги иккинчи нуфузли мусобақа ҳисобланади.
Эслатиб ўтамиз, 2024 йилда Ўзбекистонда ФИФА футзал Жаҳон чемпионати ташкил этилганди.