Манба: ЎФА Фабио Каннаваро билан музокара ўтказди
2006 йилги “Олтин тўп” соҳиби Каннаваро миллий жамоани бошқариши мумкин. Аввал Паулу Бенту рад жавоби берганди.
Италиялик мураббий Ўзбекистонни бошқариши мумкин.
Ўзбекистон футбол федерацияси 2006 йилги “Олтин тўп” соҳиби Фабио Каннаваро билан боғланган. Унинг миллий терма жамоага бош мураббий этиб тайинланиши масаласини муҳокама қилинган.
Бу ҳақда журналист ва инсайдер Фабрицио Романо ўзининг ижтимоий тармоқдаги саҳифасида хабар берди.
Манбага кўра, айни дамда Ўзбекистон футбол федерацияси ва Каннаваро ўртасида музокаралар давом этмоқда.
Сўнгги вақтларда ЎФА хориждан фаол тарзда мураббий излаяпти.
Футбол бўйича Германия терма жамоасига устозлик қилган германиялик мураббий Йоахим Лёв Ўзбекистон миллий терма жамоаси бош мураббийлигидан воз кечгани аввалроқ хабар қилинганди.
Сўнгра Фотиҳ Терим варианти ҳам кўриб чиқилди. Шунингдек, португалиялик Паулу Бенту Ўзбекистон таклифини рад этди. Мураббий ЎФА билан шартнома шартларини келиша олмаган.