Трамп Исроил Ғарбий соҳилни босиб олишига йўл қўймаслигини айтди
"Исроил Ғарбий соҳилни қўшиб олишига йўл қўймайман. Тўхташ вақти келди", деган АҚШ президенти. У Нетаняҳуга Ғазодаги урушни тугатиш режасини ҳам тақдим этади.
АҚШ президенти Доналд Трамп Исроил томонидан Фаластин Ғарбий соҳили эгалланишига йўл қўймаслигини айтди.
Шунингдек, Трамп маъмурияти Исроил бош вазири Бинямин Нетаняхуни Америка етакчисининг Ғазо секторидаги урушни тугатиш режасини қабул қилишга ундамоқда, можаронинг давом этиши Исроилни янада яккалаб қўйиши ҳақида огоҳлантирмоқда, деб хабар беради Axios.
Нашрнинг ёзишича, бу позиция Ню-Йоркда АҚШ махсус вакили Стив Уиткофф ва Трампнинг куёви Жаред Кушнернинг Нетаняху ва Исроил стратегик режалаштириш вазири Рон Дермер билан учрашувида баён қилинган.
“Оқ уй Нетаняхуга урушни давом эттириш Исроилни янада яккалаб қўйишини ва уни тугатиш тескари натижага олиб келишини айтмоқда”, — деб ёзади Axios манбасига таяниб.
Нашрнинг таъкидлашича, АҚШ маъмурияти Нетаняхудан Трампнинг Фаластин анклавидаги урушни тугатиш режасини қабул қилишга ундамоқда.
Нетаняху душанба куни Трампнинг ўзи билан Ғазо секторидаги режа ва кейинги ҳаракатларни муҳокама қилиш учун учрашади.
25 сентябр куни эрталаб Трамп Оқ уйда журналистларга Нетаняхунинг Ғарбий Соҳилни аннексия қилишига “йўл қўймаслигини” айтган.
"Исроилнинг Ғарбий Соҳилни қўшиб олишига йўл қўймайман. Етарли. Тўхташ вақти келди", деди АҚШ президенти ва бу масалани Исроил бош вазири билан тўғридан-тўғри муҳокама қилганини қўшимча қилди.
Axios таҳлилчиларининг фикрича, Трампнинг оммавий баёнотлари “эҳтимол Нетаняхунинг аннекция қилиш режаларига чек қўяди”.
Ҳафта бошида Трамп Саудия Арабистони, БАА, Қатар, Миср, Иордания, Туркия, Индонезия ва Покистон раҳбарлари ва юқори мартабали амалдорлари билан учрашган ва улардан Ғазо секторидаги урушни тугатиш режасини қўллаб-қувватлашни сўраган.
Араб давлатлари етакчилари Трампга унинг режасини қўллаб-қувватлаш учун бир қанча шартлар, жумладан, Исроилнинг Ғарбий Соҳил ёки Ғазо секторини аннекция қилмаслик мажбуриятини тақдим этишди.
Аввал Исроил Ғарбий соҳилдаги ишғолни кенгайтириш бўйича режани тасдиқлаганди.
Яҳудий давлати ушбу ҳудудга ўз аҳолисини кўчириб келтиришни кўпайтирмоқда. Ушбу амалиёт халқаро ҳуқуққа мувофиқ ноқонуний ҳисобланади.