B2 сертификати бўлмаган ўқитувчиларнинг йил охиригача ишлашига рухсат берилди
Бу ҳақда вазир буйруғи чиқди. Ўқитувчилардан йил охиригача бундай сертификатни олиш учун имтиҳонларда қатнашиши ҳақида тилхат олинади.
Мактабларда B2 даражадаги чет тили сертификатига эга бўлмаган ўқитувчиларнинг йил охиригача ишлашига рухсат берилди. Бу ҳақда Мактабгача ва мактаб таълими вазири Эъзозахон Каримованинг буйруғи эълон қилинди. Буйруқ 2025 йил 15 сентябрда имзоланган.
Айни пайтда улардан йил охиригача бундай сертификатни олиш учун имтиҳонларда иштирок этиши ҳақида тилхат олинади.
Вазирлик қуйи бўғинлари томонидан сертификатсиз ўқитувчиларнинг имтиҳонга тайёргарлик кўриши учун ўқув машғулотлари ташкиллаштирилади.
Эслатиб ўтамиз, Вазирлар Маҳкамасининг 2021 йил 19 майдаги қарори билан, 2024-2025-ўқув йилидан бошлаб барча хорижий тиллар ўқитувчилари камида B2 сертификатига эга бўлиши шартлиги белгилаб қўйилган эди.
Аммо педагоглар ва жамоатчилик вакилларининг мурожаатлари сабабли қарор ижроси бир йилга узайтирилганди. Яъни 2025/2026-ўқув йилидан бошлаб кучга кириши кутилганди.