Медал олган ўқитувчи пахтага ўз ихтиёри билан чиққани айтилди
Жиззахда ўқитувчи “Шуҳрат” медали билан тақдирланганини пахта даласида эшитгани ҳақида хабар тарқалди. Комиссия ҳолат юзасидан ўрганиш ўтказган.
Ижтимоий тармоқларда “Жиззахда ўқитувчи “Шуҳрат” медали билан тақдирланганини пахта даласида эшитди” сарлавҳаси остида хабар тарқалди.
Ушбу воқеа Сенатнинг Одам савдосига қарши курашиш ва муносиб меҳнат масалалари бўйича миллий комиссия томонидан ўрганилди.
Жиззах шаҳридаги 22-умумий ўрта таълим мактабининг бошланғич синф ўқитувчиси Гулбаҳор Самадова пахта йиғим-теримида якшанба куни қўшимча даромад топиш мақсадида иштирок этаётган бўлган.
Уни ушбу ишда қатнашиш учун ҳеч қандай мажбурлаш ҳолати бўлмаганлиги аниқланди.
Шу билан бирга, Миллий комиссия ходимларга уларнинг функционал вазифаларига кирмайдиган ишларга жалб қилиш ҳолатларини қонунчиликка зидлигини ҳамда бу ишлар учун маъмурий ва жиноий жавобгарлик белгиланганлигини яна бир бор эслатади, дейилади хабарда.