Трампни Фаластин давлатини тан олишга чақирувчи тарихий резолюция тақдим этилди

АҚШлик сенатор Жефф Меркли президент Доналд Трампни Фаластин давлатини расман тан олишга чақирувчи Сенат тарихидаги биринчи резолюцияни тақдим этди.

Орегон штатидан сайланган сенаторнинг баёнотида айтилишича, етти нафар демократ ва бир мустақил сенатор қўллаб-қувватлаган резолюция Оқ уй раҳбарини Фаластин давлатини тан олишга чақиради.

Резолюция матнида икки давлат қарори ҳам Фаластин, ҳам Исроилнинг хавфсизлиги ва фаровонлиги учун муқаррар эканлиги таъкидланиб, БМТ Хавфсизлик Кенгашининг 1967 йилги чегараларни белгилаган 242-резолюциясига ишора қилинади.

Резолюцияда АҚШдан халқаро ҳуқуқ ва икки давлат қарори тамойилларига мувофиқ хавфсиз Исроил давлати ва “демилитаризация қилинган” Фаластин давлатини тан олиш талаб этилади.

Бундан ташқари, ҳужжат Фаластин маъмуриятини Европа давлатларига берган ваъдаларини бажаришга ва 2026 йилда сайлов ўтказишга чақиради ва ҲАМАСни қуролларини ташлашга чақиради.

"Фаластин давлатини тан олиш нафақат Қўшма Штатлар, балки фаластинликлар ва исроилликлар эркинлик, қадр-қиммат ва хавфсизликда яшаши мумкин бўлган келажакни қуриш учун қўйиши мумкин бўлган амалий қадамдир, тўғри ишдир. Америка етакчиликни кўрсатиши керак ва ҳозир ҳаракат қилиш вақти келди", - деди Меркли Сенатга киритилган резолюцияни шарҳлар экан.

Сенатор мазкур қарор бошқача ёндашувни талаб қилишини таъкидлади. "Биринчидан, зудлик билан ўт очишни тўхтатиш, барча маҳбуслар озод қилиниши, инсонпарварлик ёрдами етказилиши керак. Аммо кейин тинчлик ва фаровонлик келажаги учун пойдевор қўйилиши керак ва бунинг учун ягона реал йўл икки давлат қароридир. Фаластин давлати мақсадини энди кечиктириб бўлмайди", - деди у.

Меркли ташаббус кўрсатган резолюция демократ сенаторлар Крис Ван Холлен, Тим Кейн, Питер Уэлч, Тина Смит, Темми Болдуин, Мази Хироно ва мустақил сенатор Берни Сандерс томонидан ишлаб чиқилган.

Эслатиб ўтамиз, аввал Япония "АҚШ билан яхши муносабатларни сақлаб қолиш учун" Фаластинни тан олмаслигини билдирганди.

Расмий Токио Фаластинни тан олмаган кам сонли Осиё давлатларидан саналади. Жанубий Корея ҳам шунинг сирасига киради.