Трамп Тайванга бериладиган катта ёрдамни тўхтатиб қўйди
АҚШ маъмурияти бу орқали Хитой билан кенг савдо келишувига эришишни кўзлаётган бўлиши мумкин. Аммо мазкур қарор танқидларга ҳам сабаб бўлди.
АҚШ президенти Доналд Трамп Тайванга бериладиган 400 миллион долларлик ҳарбий ёрдамни блоклади, деб ёзади The Washington Post.
Нашр манбаларининг қайд этишича, бу қарор ҳали якуний эмас.
Тўғридан-тўғри қўллаб-қувватлаш ўрнига, Трамп расмий Тайпей қуролларни ҳарбий ёрдам дастурлари орқали эмас, балки тижорат шартномалари орқали сотиб олиши кераклигини таъкидлайди.
Мақолада айтилишича, Трамп маъмурияти Пекин билан кенг савдо келишувига эришиш мақсадида АҚШнинг Хитой билан рақобатини умуман юмшатган. Хусусан, Вашингтон яримўтказгичлар экспорти устидан назоратни юмшатди.
15 сентябр куни АҚШ ва Хитой ТикТок ижтимоий тармоғи устидан назоратни Америка томонига ўтказиш бўйича келишувга эришганини эълон қилганди.
1949 йилда мустақиллигини эълон қилган Тайван 1980-йиллардан бери Хитой томонидан илгари сурилган “бир давлат, икки тизим” моделини рад этади.
Вашингтоннинг Тайпей билан дипломатик алоқалари йўқ, аммо Қўшма Штатлар 1979 йилда қабул қилинган, ўзини-ўзи мудофаа қилишни назарда тутувчи Тайван муносабатлари тўғрисидаги қонунга биноан унга қурол сотади.
Хитой Тайванни провинцияси деб ҳисоблайди: Ташқи ишлар вазири Ван Йи “миллий бирлашиш умумий тенденция ва тарихий муқаррарлик” эканини таъкидлади.
Баъзи АҚШ расмийлари Трамп маъмуриятининг бу ҳаракатини маъқулламайди. Пентагоннинг собиқ расмийси, ҳозирда American Interprice Institute ходими Ден Блументалнинг айтишича, ҳозир бундай қадамнинг вақти эмас.
Қарор етказиб бериш жараёнини кечиктириши ва Тайваннинг ҳарбий харажатларини ошириши мумкин. Газета буни Вашингтон орол хавфсизлигини таъминлашга ёндашувини қайта кўриб чиқаётганидан далолат беришини айтган.