Кремл Трампнинг фитна ҳақидаги сўзларига жавоб қайтарди
Путиннинг ёрдамчиси Россия томони АҚШ раҳбарининг иддаосини инкор этишини билдирган.
Кремл томони АҚШ президенти Доналд Трампнинг Россия, Хитой ва КХДР раҳбарлари ўртасидаги “фитна” ҳақидаги хабарини ўқиб чиқди, деди Путиннинг ёрдамчиси Юрий Ушаков.
“Ижтимоий тармоқларда Трампнинг Россия, Хитой ва КХДР ўртасида АҚШга қарши гўёки “фитна” тузилаётгани ҳақидаги гапларини ўқидик. Бу асосга эга эмас. Ҳеч ким фитна тузиш ҳақида ўйламаяпти. Уччала раҳбардан биронтаси бу ҳақда ўйлагани ҳам йўқ”, — деди Ушаков “Россия 1” телеканали журналисти Павел Зарубинга.
Шунингдек, Ушаков Трампнинг халқаро майдондаги муҳим шахс эканини эътироф этган.
3 сентябрда Пекинда Хитой халқининг Япония агрессиясига қарши қаршилик уруши ва Иккинчи жаҳон урушидаги ғалабанинг 80 йиллигига бағишланган тантанали тадбирлар, жумладан, Тянанмен майдонида кенг кўламли ҳарбий парад бўлиб ўтди.
Эслатиб ўтамиз, аввалроқ Трамп Truth Social ижтимоий тармоғида Пекиндаги ҳарбий парад ҳақида ёзганди.
Унинг айтишича, Россия, Хитой ва КХДР АҚШга қарши “фитна” режалаштирмоқда.