АҚШ икки ҳафтадан кейин Россияга қарши кескин чоралар кўриши мумкин
Аввалроқ Трамп Россияга урушни тўхтатиш учун 10 кун муҳлат берганди. Аммо бу муддат ўтиб кетса ҳам чекловлар киритилмади.
АҚШ икки ҳафтадан кейин Россияга қарши йирик санкциялар киритиши мумкин.
Мамлакат президенти Доналд Трамп маҳаллий журналистнинг Россия президенти Владимир Путинга Украинадаги можарони ҳал қилиш учун қанча вақт бергани ҳақидаги саволига жавоб берар экан, шундай деди: "икки ҳафта".
Кейин Трамп Украина муаммоси динамикасига қараб, санкциялар, божлар қўллаши ёки музокара жараёнидан чиқиши мумкинлигини айтди. Унинг сўзларига кўра, қарор икки ҳафта ичида қабул қилинади. АҚШ президенти бу ҳақда Оқ уйда матбуот анжуманида айтиб ўтди.
"Ўйлайманки, икки ҳафтадан кейин Россия ва Украинанинг муносабатини тушунаман. Агар Украинадаги уруш тўхтатилмаса, икки ҳафта ичида жуда муҳим қарор қабул қиламан", - деди Доналд Трамп.
Оқ Уй яқинда АҚШ Россия ва Украина президентлари учрашувига тайёргарлик кўраётганини эълон қилганди.
Трампнинг "таҳдид"лари
Доналд Трамп русларга аввалроқ ҳам ултиматум қўйган эди: агар Россия Украинадаги ҳарбий амалиётларини тўхтатмаса 8 августдан мамлакатга санкциялар жорий қилиши ва ҳамкор мамлакатлар товарларига 100 фоизлик божлар жорий этилиши мумкин эди.
Кўп ўтмай, Россия Федерацияси ва Қўшма Штатлар президентлари Аляскада учрашди ва Доналд Трамп кейинроқ бу ультиматум ҳақида гапирмай қўйди.