Саида Мирзиёева Қирғизистон президенти билан учрашди
Учрашувда мамлакатларда ўтказилаётган "Заковат" интеллектуал ўйини мусобақалари ҳам эътироф этилди.
Ўзбекистон Президенти Администрацияси раҳбари Саида Мирзиёева Қирғизистон президенти Садир Жапаров билан учрашди.
Учрашувда халқларимизни ўзаро ишонч ва ҳурмат асосида тараққиёт ва фаровонликка интилиш бирлаштираётгани алоҳида таъкидланди.
"Қирғиз Республикаси Президенти Садир Жапаровга самимий қабул ва очиқ ҳамда ишончли руҳда ўтган мазмунли учрашув учун миннатдорлик изҳор этаман.
Мамлакатимиз Президенти Шавкат Мирзиёев Қирғизистон билан энг яқин қўшни ва стратегик ҳамкор сифатида муносабатларни мустаҳкамлашга алоҳида аҳамият қаратади", дея ёзади Мирзиёева.
У чегара масалалари бўйича муваффақиятли келишувлар, миллий ID ҳужжатларини ўзаро тан олиш, қўшма корхоналар ҳамда Қамбарота ГЭС-1 ва Хитой – Қирғизистон – Ўзбекистон темир йўли каби йирик умумий лойиҳалар мисол сифатида келтирди.
Учрашувда мамлакатларимизда ўтказилаётган "Заковат" интеллектуал ўйини мусобақалари ҳам эътироф этилди.
Бу лойиҳа ёшлар ўртасида дўстона алоқаларни мустаҳкамлашга хизмат қилаётган жуда самарали ташаббус сифатида қайд этилган.