ҲАМАС Исроил билан икки ойлик сулҳга рози бўлди
Исроил ҳозирда ушбу келишувни кўриб чиқмоқда. Улар аввалроқ бутун Ғазони босиб олишга тайёрланаётган эди.
ҲАМАС ҳаракати Миср ва Қатар таклиф қилган 60 кунлик сулҳга рози бўлди, деб хабар берди The Jerusalim Post ўз манбасига асосланиб.
Таклиф, шунингдек, умрбод қамоқ жазосини ўтаётган 150 нафар фаластинлик маҳбус эвазига 10 нафар исроиллик гаровга олинганларни озод этишни ҳам ўз ичига олади.
Исроил Бош вазири Бинямин Нетаняху келишувни кўриб чиқмоқда, гарчи унинг идораси Исроилнинг позицияси ўзгармаслигини айтганди: расмийлар барча гаровга олинганларни озод қилишни таъминлайдиган кенг қамровли келишувни талаб қилмоқда.
Миср расмийсининг Reuters агентлигига айтишича, бу таклиф урушни тугатиш бўйича кенгроқ келишувга эришиш йўлидаги қадам бўлиши мумкин.
Сўнгги маълумотларга кўра, ҲАМАС қўлида 49 киши гаровда қолмоқда. Исроил разведкаси улардан 27 нафари ўлган деб ҳисобламоқда. AFP агентлигининг Фаластин Исломий Жиҳодидаги манбаси биринчи босқичда гаровга олинган ўн нафар исроилликни озод қилиш, шунингдек, бир нечта жасадларни топшириш таклиф қилинганини айтди.
“Қолган маҳбуслар иккинчи босқичда озод қилинади, шундан сўнг ниҳоят халқаро кафолатлар билан урушни тугатиш бўйича кенгроқ келишув бўйича зудлик билан музокаралар олиб борилади”, деди агентлик манбаси.
Бунинг эвазига Исроил фаластинлик маҳбусларни озод қилади.
Келишув Ғазо аҳолисини барча зарур нарсалар билан таъминлаш учун гуманитар ёрдам етказишни ҳам назарда тутади.
Исроил ва Ғазо уруши
Сўнгги кунларда Исроилни урушга қарши намойишлар қамраб олди. Унда миллион нафаргача киши иштирок этгани айтилмоқда.
Намойишчилар қуролли ҳаракатларни тўхтатиш, тинчликка эришиш ва асирларни озод этишни сўрамоқда.
Исроил ҳукумати эса Ғазони оккупация қилишга киришган.