Трамп урушни тўхтатиш учун Зеленскийга икки шарт айтди
Бу Қримдан воз кечиш ва НАТОга аъзо бўлмасликни назарда тутади. Бугун Украина раҳбари АҚШга ташриф буюради.
АҚШ президенти Доналд Трамп Украина президенти Зеленский икки шарт эвазига урушни тўхтатиши мумкинлигини айтди.
Булар Қрим ва НАТОдан воз кечишдир. Трампга кўра, бу омиллар урушни тўхтатиши мумкин.
"Украина президенти Зеленский агар хоҳласа, Россия билан урушни деярли дарҳол тугатиши ёки жангни давом эттириши мумкин. Ҳаммаси қандай бошланганини эсланг. Обама томонидан берилган Қрим қайтарилмайди (12 йил олдин, бирорта ҳам ўқ отилмасдан эгалланган!). Ва Украина НАТОГА қўшилмайди". Трамп бу ҳақда ўзининг Truth Social ижтимоий тармоғида Украина раҳбарининг Оқ уйга ташрифи арафасида ёзган.
Бугун Вашингтонга ташрифи чоғида Зеленскийга Буюк Британия, Италия, Германия, Франция ва Финляндия раҳбарлари, шунингдек, НАТО Бош котиби ва Еврокомиссия раҳбари ҳамроҳлик қилади.
"Эртага Оқ уйда муҳим кун бўлади. Ҳеч қачон бунчалик кўп Европа етакчилари бир вақтнинг ўзида у ерда бўлмаган. Мен уларни меҳмон қилишдан фахрланаман", деб ёзган Трамп бошқа постида.
CNN таъкидлаганидек, Трампнинг баёноти Зеленский Оқ уйдаги учрашувда дуч келадиган босимни акс эттиради.
“Санаб ўтган икки шарт – Украина Россия 2014 йилда ноқонуний равишда аннексия қилган Қримни бериши ва ҳеч қачон НАТОга қўшилмаслик Владимир Путин урушни тугатиш учун қўйган шартлар қаторига киради”, деб ёзади телеканал.
Трамп ва Украина
15 август Трамп Аляскада Россия раҳбари Владимир Путин билан учрашди. Унда Путин қатор талабларни илгари сурган.
Улар ичида Донецк вилоятидан чиқиб кетиш, НАТОга аъзо бўлмаслик ва бошқа талаблар бор.