Алишер Қодиров паспортга расмга тушишда рўмолни ечтиришни бекор қилишга чақирди
Сиёсатчи "Женнифер Лопесга кўрсатилган бағрикенгликни диндор аёлларга ҳам қўллаш кераклиги"ни ёзган.
Қонунчилик палатаси спикери ўринбосари, "Миллий тикланиш" партияси раҳбари Алишер Қодиров ҳужжат учун расмга тушишда аёлларнинг рўмолини ечтириш амалиётини бекор қилишга чақирди. Ва ўз фикрини жаҳон юлдузи Женнифер Лопеснинг Тошкентдаги концерти билан боғлади.
Гап нимада?
Қодировга кўра, ҳужжат учун расмга тушишда рўмолни ечтириш амалиёти дунёвийлик ва инсон ҳуқуқлари тамойилига тўғри келмайди.
"Женнифер Лопеснинг концерти сердаромад иш ва ёпиқ тадбир, наркотика тарқатиб, давлатга қарши тарғибот қилмаса, ўтказади, танасини кўрсатиш уни танлови, кўриш эса тадбирга билет олганларники, дунёвийлик шу!
Лекин, худди шундай ўраниб юрмоқчи бўлган аёл ватандошни ҳам танлови қонун билан ҳимоя қилинган. Ялонғоч намойишини дунёвийлик деб қабул қилдик, энди ёпиниб юриш ҳуқуқига ҳам даҳл қилмаслик кераклигини қабул қилайлик. Лопесга қандай кийинишни ўргатмаганимиздек, эътиқодли аёлларимизга рўмолни қандай ўрашни ўргатишни, қолаверса, шу ёшга келиб эътиқоди талабига риоя қилган аёлларни паспортга рўмолини ечиб тушишга мажбурлашни ҳам тўхтатиш керак. Идентификация талаблари юзни очиқ бўлишини тақозо қилади, сочни эмас. Лопесга кўрсатган бағрикенглигимизни диндор аёлларимизга ҳам кўрсатайлик", дея ёзади Қодиров ўз саҳифасида.
Унинг айтишича," Ўзбекистон дунёвий давлат, дунёвий давлат кўпчилик сайлаган Парламент томонидан қабул қилиниб, кўпчилик сайлаган Президент томонидан мақулланган қонунларни бузмаган ҳолда, ўзи истаганидек яшаш имконини беради".
Эслатиб ўтамиз, 7 август куни Женнифер Лопес Тошкентдаги "Бунёдкор" стадионида концерт берди. Аввалроқ у Арманистон пойтахти Ереванда ҳам концерт берган ва шаҳар стадиони ушбу ҳодисадан кейин жиддий зарарлангани ОАВда эълон қилинган эди. Энди Лопес 10 августда Олмаоатада концерт беради.
