Яман қирғоқларида 50 дан ошиқ муҳожир чўкиб кетди

Яман қирғоқларида 50 нафардан ошиқ мигрант чўкиб кетди.

Яман қирғоқлари яқинида қайиқ ҳалокати оқибатида ҳалок бўлганлар сони 54 кишига етди, дея хабар бермоқда Reuters тиббиёт ходимларига асосланиб. Агентлик маълумотларига кўра, қайиқ ноқулай об-ҳаво шароити туфайли чўкиб кетган.

Яманнинг Mareb Press нашри хабарига кўра, қайиқдаги йўловчиларнинг аксарияти Эфиопиядан келган ноқонуний муҳожирлар бўлган.

Улар араб давлатларидан (жумладан Саудия Арабистони) қўним топиш мақсадида кетаётган бўлган. Хитойнинг “Синхуа” агентлигининг хабар беришича, дастлабки маълумотларга кўра, қайиқда 150 киши бўлган. Уларнинг ўнлаблари бедарак йўқолган.

Синхуа агентлигининг хабардор манбасига кўра, қайиқ 2 август куни чўкиб кетган. 3 август куни эрталабдан бери Шакра ва Занзибар шаҳарлари пляжларида 20 дан ортиқ ўлик муҳожирлар жасади топилган. 12 киши шифохонага етказилган. Абяне шаҳри ҳуқуқ-тартибот идоралари чўкиб кетган муҳожирларнинг жасадларини қидиришни давом эттирмоқда.