Трамп ва урушлар: Россияга 8 августгача муҳлат, исроиллик собиқ амалдорлар эса можарони тугатмоқчи

АҚШ президенти Доналд Трамп агар Украинада 8 августгача ўт очишни тўхтатиш келишувига эришилмаса, АҚШ Россияга қарши янги санкциялар жорий этишини айтди.

Бу сана Трамп аввалроқ эълон қилган ўн кунлик ултиматумнинг якунини англатади.

"Санкциялар бўлади, лекин Россия улардан қочишда анчагина муваффақиятга эришганга ўхшайди. Биласизми, улар айёр одамлар ва улардан қочишда жуда муваффақиятли, шунинг учун кўрамиз, бундан нима чиқади", - деди Доналд Трамп журналистларга.

Июль ойи ўрталарида Трамп агар 50 кун ичида Украинадаги можарони ҳал қилишда ҳеч қандай ўзгаришлар бўлмаса, АҚШ Россиядан углеводородларни сотиб олувчи давлатларга иккиламчи божлар жорий этишини маълум қилган эди. Кейинроқ бу муддатни ўн кунга қисқартириб, 8 августга белгиланган.

Россия президенти Владимир Путин Доналд Трампнинг “ҳафсаласи пир бўлганини” изоҳлар экан, “барча кўнгилсизликлар ҳаддан ташқари кутишдан келиб чиқади”, деб таъкидлади.

Шунингдек, Исроилнинг юзлаб истеъфодаги хавфсизлик амалдорлари, жумладан, разведка идораларининг собиқ раҳбарлари АҚШ президенти Доналд Трампни Ғазодаги урушни тўхтатиш учун ўз ҳукуматига босим ўтказишга чақирди.

"Бизнинг профессионал хулосамизча, ҲАМАС энди Исроилга стратегик хавф туғдирмайди", деб ёзган собиқ амалдорлар душанба куни ОАВга йўллаган очиқ хатида.

"Аввалига бу уруш адолатли уруш, мудофаа уруши эди, аммо биз барча ҳарбий мақсадларга эришганимиздан сўнг, бу уруш адолатли уруш бўлишни тўхтатди", деди Шин Бет хавфсизлик хизматининг собиқ директори Ами Аялон.

Уруш "Исроил давлатини ўз хавфсизлиги ва ўзига хослигини йўқотишига олиб келади", деб огоҳлантирди Аялон мактубга ҳамроҳлик қилган видеода.

550 киши, жумладан, Шин Бет ва Моссад жосуслик агентлигининг собиқ раҳбарлари томонидан имзоланган мактубда Трамп Бош вазир Бенямин Нетаняхуни ўт очишни тўхтатишга “йўналтиришга” чақирилган.

Сўнгги ҳафталарда Исроил Ғазодан озод қилинган исроиллик гаровга олинганлар ва БМТ агентликлари гуманитар ёрдам тарқатиши мумкин бўлган ўт очишни тўхтатиш бўйича келишувга эришиш учун ортиб бораётган халқаро босим остида қолди.

Аммо Исроилдаги баъзилар, жумладан Нетаняхунинг коалицион ҳукуматидаги вазирлар бунинг ўрнига исроиллик кучларни ҳаракатга келтириш ва Ғазонинг тўлиқ ёки қисман босиб олинишини талаб қилмоқда.