Бухорода солиқ инспекторига нисбатан жиноят иши очилди
У маҳаллий МЧЖ раҳбарининг мол-мулкига қўйилган тақиқни бекор қилиш эвазига пора талаб қилган.
Бухорода солиқ инспекторига жиноят иши қўзғатилди.
Бухоро шаҳрида фаолият юритувчи МЧЖ 2024 йил ноябр-декабр ҳамда 2025 йил январ-феврал ойлари учун айланмадан олинадиган солиқ ҳисоботи ва даромад солиқ ҳисоботини ўз вақтида тақдим этмаган. Натижада МЧЖ раҳбарига нисбатан Бухоро шаҳар солиқ инспекцияси томонидан маъмурий жазо қўллаш тўғрисидаги қарорга асосан МИБ Бухоро шаҳар бўлими томонидан ижро иши қўзғатилади.
Ўз навбатида, жиноят ишлари бўйича Бухоро шаҳар суди томонидан эса МЧЖга нисбатан қўлланилган жазони бекор қилиш тўғрисида қарор чиқарилади.
Аммо, Бухоро шаҳар давлат солиқ инспекцияси шўъба бош инспектори суд қарорига асосан МЧЖ раҳбарининг мол-мулкига қўйилган тақиқни бекор қилиш эвазига 400 АҚШ доллари талаб қилади.
ДХХ ва ИЖҚК Департаменти вилоят бошқармалари томонидан ўтказилган тезкор тадбирда инспектор талаб қилинган пул маблағини олган вақтида ушланди.
Ҳозирда унга нисбатан жиноят иши қўзғатилиб, тергов ҳаракатлари олиб борилмоқда.
Аввалроқ Тошкент вилоятида адвокат пора билан ушланганди.