Саида Мирзиёевага янги ваколатлар берилди
Энди Администрация раҳбари Президент маслаҳатчилари ва бўлинма раҳбарларининг ўринбосарларини тайинлаши мумкин бўлади.
Президент Администрацияси раҳбари Саида Мирзиёевага янги ваколатлар берилмоқда.
Бу ҳақда "Давлат бошқаруви тизимида самарадорлик, проактивлик ва натижадорликни ошириш чора-тадбирлари тўғрисида"ги Президент фармонида келтириб ўтилган.
Эндиликда Администрация раҳбари:
– Президент маслаҳатчилари ва бўлинма раҳбарларининг ўринбосарларини тайинлайди ва озод этади, мазкур лавозимларга аввал тайинланган мансабдорларни лавозимидан озод этади;
-Администрация ходимлари штатлар жадвалини тасдиқлайди;
– маҳаллий ва хорижий экспертларни тўғридан-тўғри шартнома асосида жалб қилиши мумкин;
– ходимларни аттестациядан ўтказади ва салоҳиятли кадрларни танлаб олади;
– мутахассислар учун иш ҳақини миллий ёки чет эл валютасида белгилайди;
– харажатлар сметасини ва моддий рағбатлантиришни мустақил тасдиқлайди.
Эслатиб ўтамиз, аввалроқ ушбу фармон билан АОКА тугатилгани ва унинг вазифалари бошқа ташкилотларга бўлиб берилгани хабар қилинганди.