Украина урушида қурбон бўлган ўзбекистонликлар сони эълон қилинди

Украинадаги урушда Россия томонидан урушган 66 нафар ўзбекистонлик ҳалок бўлган.

Охирги икки ҳафта ичида, июн ойининг охиридан июл ойи бошигача BBC, Медиазона ва кўнгиллилар гуруҳи Россия-Украина можаросида ҳалок бўлган 500 дан ортиқ хорижлик фуқароларни аниқлаш учун очиқ манбали тадқиқот ўтказди.

Ўлганлар сони бўйича Ўзбекистон 66 киши билан рўйхатда учинчи ўринни эгаллади.

Биринчи ўринда Тожикистон (72 қурбон), иккинчи ўринда Непал (70) жой олган. Умуман олганда, расмий баёнотлар, ижтимоий тармоқлардаги постлар ва қабрлар фотосуратларидан тузилган маълумотлар базасига шартнома имзоланган пайтда Россия фуқаролигига эга бўлмаган 28 давлатдан келган хорижликлар киритилган.

Таҳлиллар ҳалок бўлган Ўзбекистон фуқароларининг ярмидан кўпи, 46 нафари Россия қамоқхоналарида бўлганини кўрсатди. Марказий Осиёнинг бошқа давлатларида бўлгани каби, ўзбекларнинг салмоқли қисми қамоқхоналарда урушга юборилиб, асосан "Вагнер" ширкати билан тузилган шартнома асосида фронтга жўнатилган.

Ҳалок бўлган Тожикистон фуқаролари орасида 43 киши ҳам шартнома имзоланмагунча қамалган.

Муҳожирларга урушда қатнашиш эвазига фуқаролик ҳолатини қонунийлаштириш ваъда қилинган.

Ҳуқуқ фаолларига кўра, уруш Марказий Осиёдан келган меҳнат муҳожирларига босим ўтказиш қуролига айланган. Уларга қуйидагилар эвазига ҳарбий ҳаракатларда иштирок этиш таклиф этилади:

-Россияга кириш тақиқини бекор қилиш;

- фуқароликни тезлаштириш;

- депортация ёки шартли равишда озод қилиш тўғрисидаги қарорни бекор қилиш.

Тадқиқот муаллифларининг таъкидлашича, рўйхатга фақат хорижлик ўлими очиқ манбаларда қайд этилган тасдиқланган ҳолатлар киритилган.

Апрел ойи бошида Украинага қарши урушнинг биринчи йилида собиқ СССР республикаларидан меҳнат муҳожирлари Россия армиясига жалб қилингани маълум бўлган эди.

Яблочковдаги саралаш пунктидан бир йил давомида камида 523 киши ўтган, улардан 71 нафари Ўзбекистон фуқаролари, шунингдек, Тожикистон, Беларус, Қирғизистон ва Қозоғистондан келган мигрантлардир.

Эслатиб ўтамиз, Ўзбекистон қонунчилигида ёлланма аскарлик учун 10 йилгача қамоқ жазоси мавжуд.