Трамп Украинага қурол бериш бўйича янги режани эълон қилади
Бу режа нафақат мудофаа тизимлари, балки ҳужум қуролларини ҳам ўз ичига олади.
АҚШ президенти Доналд Трамп бугун, 14 июл куни Украинага қурол етказиб бериш бўйича янги режани эълон қилади.
Бу режа нафақат зенит тизимлари, балки ҳужум қуролларини ҳам ўз ичига олади. Бу ҳақда аноним ахборот манбаларига асосланиб Axios нашри хабар берди.
"Икки манбанинг Axiosʼга айтишича, улар режага Россиянинг ички қисмидаги нишонларга, жумладан, Москвага етиб бориши мумкин бўлган узоқ масофали ракеталарни ўз ичига олади, деб ишонишга асослари бор. Бироқ ҳеч бирида якуний қарор ҳақида маълумот йўқ", деб ёзади нашр.
"Путин ҳақиқатан ҳам Трампни ғазаблантирди. Унинг эртанги баёноти жуда қатъий бўлади", - дея республикачи сенатор Линдси Грэмнинг сўзларини келтиради нашр.
ОАВда мавжуд бўлган маълумотларга кўра, янги режа Трамп ва НАТО бош котиби Марк Рютте ўртасидаги учрашувда эълон қилинади.
Шу билан бирга, Американинг Украинага қурол-яроғ етказиб бериш харажатлари Европа иттифоқи аъзолари томонидан тўланади. Бу механизм июн ойида НАТО саммитида Украина президенти Владимир Зеленский томонидан таклиф қилинган.
"Биз Украинага Patriotʼларни жўнатамиз, бу уларга жуда керак, чунки Путин кўпчиликни ҳайратда қолдирди. У чиройли гапиради, кейин эса кечқурун ҳаммани бомбардимон қила бошлайди. Лекин бир кичик муаммо бор: бу менга ёқмайди", деди Трамп якшанба куни журналистларга.
"Биз асосан уларга ҳар хил турдаги жуда мураккаб ҳарбий техника жўнатмоқчимиз. Улар (европаликлар) 100% тўлайдилар", - дея қўшимча қилди Трамп.
Эслатиб ўтамиз, Трамп Путин билан бир нечта суҳбат ўтказди. Айниқса охирги суҳбат АҚШ президентини мутлақо қониқтирмагани маълум бўлди.