Россия Украинага қарши катта ҳужум уюштирди
Бу жараён АҚШ ва Россия президентлари телефон мулоқотидан сўнг содир бўлди. Трамп суҳбатдан кўнгли тўлмаганини айтган.
Россия қуролли кучлари Украина ҳудудларига қарши оммавий ракета ҳужуми уюштирди.
Бу РФ президенти Владимир Путиннинг АҚШ раҳбари билан суҳбатидан кейин содир бўлди.
Украина президенти Владимир Зеленский Россия билан бутун ҳарбий можаро давомида Киевга берилган энг йирик зарбалардан бири ҳақида хабар берди. Унга кўра, Россия камида 550 та дрон ва ракеталарни учирди.
Киев мэри Виталий Кличконинг қайд этишича, камида 23 киши жабрланган, шаҳар аҳолиси пойтахтдаги портлашлардан қўрқиб, тун бўйи яшириниб чиққан.
Нафақат Украина пойтахти ҳужумга учради - зарбалар натижасида Днепропетровск, Суми, Харков, Чернигов ва Киев вилоятлари жабр кўрди.
"Пойтахтимиз яна кенг кўламли зарба нишонига айланди. Бу яна бир далил: кенг кўламли босимсиз Россия ўзининг бузғунчи векторини ўзгартирмайди. Ҳозир кўп нарса шерикларга, биринчи навбатда АҚШГА боғлиқ", деб ёзади Зеленский.
Эслатиб ўтамиз, яқинда Трамп ва Путин ўртасида яна бир суҳбат бўлиб ўтди.
Америка раҳбари қуролли можарога имкон қадар тезроқ барҳам бериш зарурлиги ҳақида гапирди, унинг россиялик ҳамкасби ўз мақсадларидан қайтмаслигини таъкидлади.
Тез орада Трамп Путин билан суҳбатдан ҳафсаласи пир бўлганини айтди. У Зеленский билан вазиятни муҳокама қилишни режалаштирмоқда.
Яқинда Оқ уй Қўшма Штатлар Украинага ваъда қилинган ўқ-дориларнинг бир қисмини етказиб беришни тўхтатиши ҳақида хабар берганди. Бу хусусан, Patriot тизимларига тегишли.