Бухоро вилояти собиқ ҳокими вафот этди
Дамир Ёдгоров раҳбарлигида вилоятда селекция ва уруғчилик соҳасини илмий ривожлантириш борасида муҳим ишлар амалга оширилган.
Бухоро жамоатчилиги жудоликка учради. Давлат ва жамоат арбоби Дамир Салихович Ёдгоров 4 июл куни узоқ давом этган хасталикдан сўнг 88 ёшида вафот этди. Бу ҳақда Бухоро вилояти ҳокимлиги хабар берди.
Дамир Ёдгоров 1937 йил 18 февральда Шофиркон туманида туғилди. Ўрта мактабни тугатиб, 1960 йилда Тошкент қишлоқ хўжалиги институтини муваффақиятли тамомлаган.
Меҳнат фаолиятини Тошкент қишлоқ хўжалиги институти ёшлар қўмитасининг котиблиги лавозимидан бошлаб, узоқ йиллар Ёшлар ташкилоти ҳамда қишлоқ ва сув хўжалиги тизимидаги масъул вазифаларда ишлади.
У 1992-1994-йилларда Бухоро вилояти ҳокими сифатида ишлаган ишлаган.
Унинг бевосита раҳбарлигида вилоятда селекция ва уруғчилик соҳасини илмий ривожлантириш борасида қатор ишлар амалга оширилди. Хусусан, Ўзбекистон пахтачилик илмий-тадқиқот институти Бухоро филиали директори сифатидаги меҳнат фаолияти йилларида пахтанинг Зарафшон воҳасига мос 10 га яқин иқтисодий самарадор навлари кашф этилди.
Дамир Ёдгоров “Ўзбекистон Республикасида хизмат кўрсатган қишлоқ хўжалик ходими” унвони, “Меҳнат шуҳрати” ордени билан мукофотланган эди.