Трамп: Исроил Ғазода икки ойлик оташкесимга рози бўлди
Қатар ва Миср ҲАМАС вакилларига якуний таклифни етказади.
АҚШ президенти Доналд Трампга кўра, Исроил Ғазода 60 кунлик оташкесим шартларига рози бўлди.
Трамп Исроил томони Вашингтон вакиллари билан учрашувда Ғазо секторида икки ойлик ўт очишни тўхтатиш учун зарур бўлган шартларга рози бўлганини айтди.
"Бугун менинг вакилларим исроилликлар билан Ғазо масаласи бўйича узоқ ва самарали учрашув ўтказди. Исроил 60 кунлик ўт очишни тўхтатиш бўйича зарур шартларга рози бўлди, бу муддат давомида биз барча томонлар билан урушни тугатиш учун ишлаймиз", - деб ёзди у ўзининг Truth Social ижтимоий тармоғида.
Америка раҳбарининг сўзларига кўра, “тинчлик ўрнатиш учун жуда кўп меҳнат қилган” Қатар ва Миср ХАМАС вакилларига якуний таклифни етказади.
“Умид қиламанки, Яқин Шарқ фаровонлиги учун ХАМАС бу келишувни қабул қилади, чунки вазият яхшиланмайди, балки ёмонлашади”, — дея қўшимча қилди Трамп.
Америка матбуоти аввалроқ Исроил стратегик режалаштириш вазири Рон Дермер Оқ уй расмийлари билан Ғазо сектори ва Эрондаги вазиятни, шунингдек, Исроил Бош вазири Бенямин Нетаняхунинг АҚШГА ташрифини муҳокама қилиш учун Вашингтонга келгани ҳақида хабар берган.