Бокуда Россия ФХХ ходимлари қўлга олинди
Улар "Спутник Озарбайжон" журналистлари сифатида ишлаб келгани айтилмоқда.
Озарбайжон томони Бокуда Россия ФХХсининг икки ходими ушланганини айтди.
"Спутник Озарбайжон" агентлиги ( “Россия сегодня”нинг Боку бўлими) идорасида полиция томонидан ўтказилган операция давомида қўлга олинганлар бор.
Ички ишлар вазирлиги томонидан ўтказилган тезкор тадбир давомида Россия Федерал хавфсизлик хизмати (ФХХ)нинг ушбу агентликда ишлаган икки нафар ходими қўлга олинган.
30 июндан бошлаб Озарбайжон Ички ишлар вазирлиги "Спутник Озарбайжон" агентлигининг Бокудаги офисида операция ўтказмоқда.
Шу йилнинг феврал ойида “Россия сегодня” бўлими сифатида фаолият юритувчи “Спутник-Озарбайжон” агентлиги фаолиятини тўхтатиш тўғрисида қарор қабул қилинган эди.
Ушбу қарор Озарбайжон давлат оммавий ахборот воситаларининг хориждаги ва мамлакатдаги хорижий журналистлар фаолиятида тенгликни таъминлашга қаратилган эди.
Бошқача айтганда, Бокуда ишлаётган "Спутник-Озарбайжон" журналистларининг сони Россиядаги АЗЕРТАК журналистлари сонига тенг бўлиши керак эди. Бироқ "Спутник Озарбайжон" таҳририяти бу қарорга амал қилмади. Ўтган давр мобайнида таҳририят ва ходимлар ўз фаолиятини тўхтатмади.
Эслатиб ўтамиз, Екатеринбургда озарбайжонликларнинг қўлга олинишида икки киши ҳалок бўлди. Шундан сўнг Озарбайжон Россиянинг маданий тадбирларини бекор қилди.
Кремл эса бу қарордан афсусда эканини билдирди.