Европага жуда кучли жазирама хавф солмоқда
Сўнгги вақтларда бундай экстремал об-ҳаво ҳодисалари глобал иқлим ўзгариши сабабли тез-тез учрамоқда.
Европага жуда кучли жазирама хавф солмоқда.
Иссиқлик тўлқинлари ўтган ҳафта охирида Европанинг кўп қисмини қамраб олди, кўплаб мамлакатлар расмийлари ҳарорат кўтарилиши ва янги рекордларни янгилаши мумкинлиги сабабли фавқулодда огоҳлантиришлар беришди.
Испания миллий метеорология агентлиги (AEMET) Андалусия жануби-ғарбидаги Ҳуэлва провинциясидаги Эл-Гранадо шаҳрида ҳарорат Цельсий бўйича 46 даражага етганини маълум қилди ва бу июн ойидаги рекордни ўрнатди.
Бу Севилянинг 1965 йилдаги аввалги рекордидан ошиб кетади.
Португалия, Италия ва Хорватиянинг айрим ҳудудлари қизил огоҳлантириш ҳолатида, Франция, Австрия, Белгия, Венгрия, Сербия, Словения, Швейцария ва бошқа жойларда ҳам огоҳлантиришлар мавжуд.
Мутахассисларнинг огоҳлантиришича, бундай экстремал об-ҳаво ҳодисалари глобал иқлим ўзгариши сабабли тез-тез учраб туради.
"Менимча, бу иссиқлик йилнинг бу фасли учун одатий эмас. Мен ҳаво Мадридда йиллар ўтган сайин, айниқса, шаҳар марказида жуда иссиқ бўлиб бораётганини ҳис қиляпман", - деди AFPга ҳаво ҳарорати Цельсий бўйича 40 даражага яқинлашган Испания пойтахтида яшовчи фотограф Диэго.
Италияда 21 та шаҳар, жумладан, Милан, Неапол, Венеция, Флоренция, Рим ва Катания кабиларда жазирама иссиқ туфайли фавқулодда ҳолатлар дам олиш кунларида шай ҳолатга келтирилди.
"Биз Колизейга боришимиз керак эди, лекин онам ҳушидан кетишга оз қолди", деди Римга саёҳат қилган британиялик сайёҳ Анна Беккер.
Барселона кўчаларини тозаловчи аёл шанба куни ўз сменасини тугатгандан сўнг ҳаддан ташқари иссиқда вафот этди.
Расмийлар унинг ўлимини тергов қилмоқда. Италияда бутун мамлакат шифохоналарида, айниқса, кексалар, саратон касаллигига чалинганлар ва уйсизлар орасида иссиқлик уриши ҳолатлари кўпайганлиги ҳақида хабар беришмоқда.
Болония кондиционер ва ичимлик суви билан жиҳозланган еттита "иқлим бошпанаси" очди, Рим эса 70 ёшдан ошган одамлар учун шаҳар бассейнларини бепул қилди.