Сенат Трампнинг Эронга ҳужумини тақиқловчи резолюцияни ўтказмади
АҚШ президентининг ўзи вазият тақозо этса янги ҳужумлар бўлишини истисно этмаган.
Сенат Трампга Конгресс розилигисиз Эронга ҳужум қилишга рухсат бермаслик бўйича резолюцияни блоклади.
Эрон ядровий иншоотларига зарба берилганидан бир ҳафта ўтмасдан, АҚШ Сенати президент Доналд Трампнинг Конгресс рухсатисиз Эронга қарши келгусида ҳарбий ҳаракатлар олиб боришига тўсқинлик қилиши мумкин бўлган резолюцияни блоклади, деб ёзади The Hill.
Қарорни 47 сенатор ёқлаб, 53 нафари қарши овоз берди. Уни қабул қилиш учун 51 овоз керак эди.
Резолюция муаллифи, демократ сенатор Тим Кейн овоз беришдан олдин шундай деди:
“Ўйлайманки, бу ҳафта воқеалари бу уруш ҳар қандай одамнинг қарорига боғлиқ бўлиш учун жуда катта эканлигини кўрсатди”.
Республикачиларнинг мутлақ кўпчилиги Трампнинг Эронга зарба бериш қарорини тўлиқ қўллаб-қувватлади.
Республикачи сенатор Жон Баррассо: "У буни қатъият билан қилди, у Конституцияга мувофиқ қилди. Мен бу резолюцияни кераксиз деб ҳисоблайман", деди ва "келажакда президентнинг бизни ҳимоя қилишига тўсқинлик қилган бўлар эди" деди.
Нашрнинг эслатишича, Трамп жума куни журналистлар билан суҳбатда, агар разведка ҳамжамияти яқин ойлар ва йилларда Эроннинг уранни бойитиш имкониятлари ҳақида маълумот берса, унга қарши янги зарбаларни маъқуллашдан тортинмаслигини айтган.
"Албатта, савол йўқ", деди Трамп матбуот брифингида янги портлашлар тўлқини юзага келиши мумкинми, деган саволга.
Эслатиб ўтамиз, АҚШ 22 июн куни Эроннинг ядровий иншоотларига зарба берди.