Навоийда уй сотиш баҳонасида 411 кишини чув туширганлар аниқланди
Бошқа ҳолатда эса меҳмонхона учун рухсат олинган, лекин қурилиши тўхтатилган бино одамларга пулланган.
ДХХ Иқтисодий жиноятларга қарши курашиш департаменти ва ИИБ ходимлари томонидан тезкор тадбирлар ўтказилди. Ушбу тадбирларда уй қуриб сотиш баҳонасида одамларнинг пулларини қўлга киритган шахслар қўлга олинди.
Жумладан, Навоий шаҳридаги МЧЖ мансабдорлари 2017-2024 йилларда қурилиши битмаган 140 дан ошиқ уйларни 411 кишига пуллашган. Ҳуқуқни муҳофаза қилувчи ташкилотлар ўтказган тадбирда уларнинг фаолиятига чек қўйилди.
Яна бир ҳолат Навоий шаҳрининг "Истиқлол" маҳалласида аниқланди. Аслида меҳмонхона учун рухсат олинган, аммо шаҳарсозлик нормаларига тўғри келмагани сабаб қурилиши тўхтатилган бино аҳолига пулланган.
Зарафшон шаҳридаги ҳолатда эса қурувчилар аҳолидан уй учун мўмай пулларни ундириб олишган. Аслида эса шаҳар ҳокимининг қурилиш учун ер ажратиш бўйича қарори сохталаштирилган. Улар навбатдаги фуқарога сохта олди-сотди шартномаси билан уй сотаётганда қўлга олинди.