Хоразм вилоятида турли харажатларга 43,5 млрд сўм ажратилмоқда
"Хоразм" футбол клуби стадиони югуриш йўлагини таъмирлаш, ёритиш чироқлари ва бошқа харажатлар учун 8,6 млрд сўм сарфланади.
Халқ депутатлари Хоразм вилояти кенгаши қарори билан бюджет ташкилотлари ва бюджетдан маблағ олувчиларга 43,5 млрд сўм ажратилади. Маблағ вилоят маҳаллий бюджетининг қўшимча манбалари ҳисобидан ажратилади.
Жумладан, "Хоразм" футбол клуби стадиони югуриш йўлагини таъмирлаш, ёритиш чироқлари ва бошқа харажатлар учун 8,6 млрд сўм, Тошкентда ўтказиладиган халқаро кўргазмада Хоразм павилони учун 1,1 млрд сўм ажратилади.
Вилоятдаги 13 та умумтаълим мактабларида муҳандислик лабораторияларини жорий этиб, жиҳозлаш учун 5 млрд 563 млн сўм тақдим этилади.
Шовот туманида "Тиббиётда 90 кунлик ўзгаришлар" дастури доирасида қурилиш-таъмирлаш ишлари учун 11 млрд сўм, вилоятдаги оромгоҳларни таъмирлаш бошлаш ва бошқа харажатларга 5 млрд сўм, вилоят ҳокимлигини қўриқлаш, интернет, коммунал ва бошқаларга 2 млрд сўм берилади.
Қарор 2025 йил 16 июн куни жамоатчиликка эълон қилинди.