АҚШ Эрон билан кескинлик фонида Бағдоддаги элчихонасини қисман эвакуация қилмоқчи
Доналд Трамп мамлакат ўз ходимларини “хавфли” Яқин Шарқдан олиб чиқаётганини тасдиқлади.
Америка Қўшма Штатлари минтақада хавф ортиши сабабли Ироқдаги элчихонасини қисман эвакуация қилишга тайёрланмоқда. Бу ҳақда Reuters агентлиги хабар берди.
"Давлат департаменти мунтазам равишда хориждаги америкалик ходимларни текширади ва бу қарор яқинда ўтказилган текширув натижаларига кўра қабул қилинди", деди Оқ уй матбуот котиби Анна Келли.
Қайд этилишича, АҚШ мудофаа вазири Пит Хегсет америкалик ҳарбий хизматчиларнинг оилаларига Яқин Шарқдаги уйларини ихтиёрий равишда тарк этишга рухсат берган.
Аввалроқ Эрон мудофаа вазири Азиз Носирзода агар қуролли тўқнашув бошланса, АҚШнинг Яқин Шарқдаги барча ҳарбий базаларига зарба бериш билан таҳдид қилган эди.
Доналд Трамп Қўшма Штатлар ўз ходимларини “хавфли” Яқин Шарқдан олиб чиқаётганини тасдиқлади.
“Ҳа, улар чекинмоқда, чунки у [Яқин Шарқ] хавфли жой бўлиши мумкин”, деди АҚШ президенти Вашингтонда журналистларга. "Биз чекиниш ҳақида буйруқ бердик, кейин нима бўлишини кўрамиз".
Шунингдек, у Эроннинг ядро қуролига эга бўлишига йўл қўймаслигини айтди.
"Улар ядро қуролига эга бўлолмайди, бу жуда оддий. Биз бунга йўл қўймаймиз", - дея изоҳ берди Оқ уй раҳбари.
Эслатиб ўтамиз, Вашингтон ва Теҳрон апрел ойидан бери янги ядровий келишувни ишлаб чиқиш учун беш марта музокара ўтказган ва яқин кунларда яна учрашиши керак эди.
Эрон Мудофаа вазири Азиз Носирзода мамлакатга ҳужум қилинса, Теҳрон Американинг минтақадаги базаларига зарбалар беришини айтди.
Бағдод эвакуация қилишни талаб қиладиган ҳеч қандай таҳдидни аниқламади, дея хабар бермоқда Reuters Ироқ давлат ахборот агентлигига таяниб.
Бағдоддан эвакуация бўйича хабарлар фонида Брент нефти фючерслари бир баррел учун 69,18 долларга етди.