Қозоғистонда йўловчи автобус ёниб кетди
Автобусдан барча 34 нафар йўловчи, жумладан 9 нафар бола салондан эвакуация қилинди. Улар орасида беш нафар ўзбекистонлик ҳам бор.
Қарағанда вилоятининг Абай туманида Остона-Чимкент йўналиши бўйлаб ҳаракатланаётган йўловчи автобусида ёнғин содир бўлди. Йўловчилар орасида Ўзбекистон фуқаролари ҳам бўлган.
Қозоғистон Фавқулодда вазиятлар вазирлиги маълумотларига кўра, ҳодиса 4 июн куни Остона-Қарағанда-Олмаота автомобил йўлининг 960-километрида содир бўлган. Ёнғин автобуснинг двигател қисмида бўлган.
Ўт ўчирувчилар етиб келганда ёнғин ўчирилган. Қутқарувчиларнинг тезкор ҳаракатлари туфайли барча 34 нафар йўловчи, жумладан 9 нафар бола салондан эвакуация қилинди. Уларнинг барчасига йўл четидаги лагерда зарур ёрдам кўрсатилди.
Эвакуация қилинганлар орасида 5 нафар Ўзбекистон фуқароси ҳам бор. Ҳодиса оқибатида қурбонлар йўқ.
Вазирлик ҳайдовчиларни транспорт воситаларидан фойдаланишда, айниқса ҳаво ҳарорати юқори ва аҳоли пунктлари орасидаги масофа катта бўлган шароитда хавфсизлик чораларига риоя қилишга чақирган.