Жанубий Кореяда янги президент сайланди

Ли Чже Мён – Жанубий Кореянинг янги президентига айланди.

Навбатдан ташқари президентлик сайловларида "Тобури" либерал-демократик партияси номзоди Ли Чже Мён 49,25% овоз билан ғалаба қозонди.

Унинг рақиби, “Фуқаролик кучи” партиясидан Ким Мун Су 41,40% овоз тўплади. У сайловдаги мағлубиятини тан олди.

61 ёшли Ли камбағал деҳқон оиласида туғилган бўлиб, ҳуқуқшунослик соҳасида таълим олган. У 2010-2017 йилларда Соннам шаҳрини, 2018-2021 йилларда эса Кёнгидо провинциясини бошқарган. 2022 йилдаги президентлик сайловларида у Юн Сок Ёлдан 1 фоиздан ҳам камроқ фарқ билан мағлуб бўлган.

2024 йил январь ойида Ли қуролли ҳужумдан омон қолди, шунингдек, у бешта жиноий ишда, жумладан, коррупция ва Шимолий Кореяга пул ўтказиш билан боғлиқ ишларда айбланган.

Эслатиб ўтамиз, аввалги президент Юн Сок Ёл ҳарбий ҳолат жорий этишга уринишдан сўнг лавозимдан кетганди.