АҚШ Олий суди юз минглаб муҳожирларнинг депортациясига сабаб бўлувчи қарор чиқарди
Байден даврида Венесуэла, Ҳаити, Куба ва Никарагуадан келган малакали муҳожирларга АҚШДА яшаш ва ишлаш ҳуқуқини берувчи дастур қабул қилинганди.
АҚШ Олий суди Трамп маъмуриятига ўзидан олдинги Жо Байденнинг Венесуэла, Ҳаити, Куба ва Никарагуадан келган 500 мингдан ортиқ муҳожирга АҚШДА яшаш ва ишлаш имконини берган вақтинчалик бошпана бериш дастурини тўхтатишга рухсат берди.
Олий суд бир ой ичида иккинчи марта “Трампнинг муҳожирларнинг вақтинчалик ҳуқуқий мақомини бекор қилиш бўйича саъй-ҳаракатларини маъқуллаган".
Бунгача Америка маъмуриятига "юз минглаб" венесуэлаликларга ишлашга рухсат берувчи бошқа дастурни бекор қилишга рухсат берилган эди.
CNN'нинг қайд этишича, Олий суд қарори якуний эмас – асосий иш қуйи судларда кўрилиши давом этади. Бироқ, бу дастурдан фойдаланган 530 мингга яқин муҳожирни депортация қилишни тезлаштириш имконини беради.
Барак Обама ва Байден томонидан тайинланган 9 нафар Олий суд судьясидан иккитаси, Сония Сотомайор ва Кетанжи Браун бу қарорга қарши чиқди.
Ўз навбатида, Оқ уй аппарати раҳбари ўринбосари Стивен Миллер маъмурият муҳожирлар “энди депортация қилиниши мумкинлиги” ҳақиқатини олқишлашини айтди. Унинг айтишича, "Олий суд ҳақли равишда ишга киришди ва қуйи судларнинг ақлдан озган қарорларини бекор қилди".
Трамп маъмурияти тўхтатиб қўйишга рухсат берилган дастур 2023 йилда жорий қилинган эди. Ўшанда Байден маъмурияти мамлакатга ноқонуний киришга уринишдан кўра, ҳукумат текширувидан ўтган Венесуэла, Гаити, Куба ва Никарагуадан келган малакали муҳожирларга АҚШДА яшаш ва ишлаш ҳуқуқини беришини эълон қилган эди. Ариза берувчилар АҚШ ҳомийсига эга бўлишлари ва хавфсизлик бўйича тўлиқ текширувдан ўтишлари керак эди.
Трамп иккинчи муддатининг биринчи кунидаёқ дастурни бекор қилиш ҳақидаги фармонни имзолади.
АҚШ штат судлари президентнинг депортация ҳақидаги баъзи фармойишларини блоклади, бироқ Олий суд Трамп маъмуриятининг шикоятларини қаноатлантирди.
Сайлов кампанияси вақтида Трамп “миллионлаб” ноқонуний муҳожирларни депортация қилишга ваъда берган, бироқ таҳлилчилар бу кўрсаткични реал эмас деб ҳисоблайди. The Washington Post газетасининг ёзишича, республикачилар маъмурияти ўзининг биринчи йилида 1 миллион ноқонуний муҳожирни депортация қилмоқчи. Ҳозирча рекорд Обамага тегишли, у йилига 400 мингдан ортиқ одамни депортация қилган.