Жо Байденда саратон касаллиги аниқланди
Хасталик аллақачон тажовузкор шаклга кирган, лекин даволаш имкониятлари борлиги айтилмоқда.
АҚШ собиқ президенти Жо Байденга простата саратони ташхиси қўйилди.
82 ёшли Жо Байденда топилган саратон агрессив шаклда, суякларга метастазлар тарқалган, деб хабар беради Reuters.
АҚШ собиқ президентининг идораси ташхис 16 май куни сийдик дисфункцияси белгилари пайдо бўлганидан кейин қўйилганини айтди. Байден ва унинг оиласи энди шифокорлар билан даволаниш имкониятларини кўриб чиқмоқда.
"Бу касалликнинг янада тажовузкор шакли бўлса-да, саратон гормонларга сезгир бўлиб кўринади, бу уни самарали даволашга имкон беради", деди унинг идораси.
Байденнинг идораси касаллик простата саратонининг тажовузкорлигини аниқлаш учун ишлатиладиган Глисон шкаласи бўйича 10 баллдан тўққиз баллга баҳоланганини айтди.
Президентликка келганидан бери Байденни бир неча бор танқид қилган Доналд Трамп 18 май куни Truth Social платформасидаги постида унга ва унинг рафиқаси Жиллга ҳамдардлик билдирди:
"Мелания ва мен Жо Байденга яқинда қўйилган тиббий ташхис ҳақида қайғурдик. Жилл ва оиласига, Жога эса тез ва муваффақиятли тузалиб кетишини энг самимий ва энг яхши тилакларимизни тилаймиз".
2020 йилда сайланган пайтда Байден АҚШ президентлик сайловларида ғалаба қозонган энг кекса одам эди. 78 ёшли Трамп эса бу рекордни ўтган йили вице-президент Камала Харрисни мағлуб этиб такрорлади.