Экология вазири маслаҳатчиси ИИБга чақирилди
Расул Кушербаевнинг билдиришича, бу чақирув мақсадини тушунмаган ва ички ишлар вазиридан изоҳ сўраган.
Экология вазири маслаҳатчиси, собиқ депутат Расул Кушербаев Янгийўл тумани ИИБга чақирилган ва маълум муддат ушлаб турилган.
Бу ҳақда Кушербаевнинг ўзи маълум қилди ва ички ишлар вазиридан ҳолатга изоҳ беришни сўраган.
"Кеча маслаҳатлашиш бахонасида Янгийўл тумани ИИБга чақирилиб, бир неча соат ушлаб турилдим. Устимдан асоссиз ариза берилган. Яшаш жойим ҳам, пропискам ҳам Янгийўлда эмас. Бироқ нега Янгийўл ИИБ бу иш билан шуғулланаётгани тушунарсиз. Қизиғи, қанча тушунтиришларимга қарамай, иш учун аҳамияти бўлмаса-да, мобил телефоним олиб қўйилди", деб ёзган амалдор.
Унинг айтишича, ИИБ ходимлари Кушербаев ҳақида яширин ва шубҳали суриштирувлар олиб боряпти ва маълумотлар тўпламоқда.
Расул Кушербаев устидан тушган ариза мазмунини очиқламаган. Ички ишлар вазирлиги ҳозирча муносабат бермаган.