“Halol Bozor" номи остида иш кўрган платформага чора кўрилди

“Halol Bozor" номи остида кўчмас мулклар савдосини амалга оширувчи платформага чора кўрилди.

Рақобат қўмитаси томонидан ўтказилган мониторингларда ижтимоий тармоқлар орқали “Halol Bozor" номи остида кўчмас мулклар савдосини амалга оширувчи хизматлар тўғрисида реклама ахборотлари жойлаштирилганлиги аниқланди.

Дастлабки ўрганишларда хусусий уй-жой савдоси тўғрисида маълумот берувчи ахборот ресурси орқали кўчмас мулк олиш ниятида бўлган фуқароларни чалғитиш мақсадида ўз ахборот ресурси номланишида асоссиз равишда “Halol Bozor" номидан фойдаланганлиги маълум бўлди.

“Реклама тўғрисида”ги Қонунининг 16-моддасига кўра, номақбул (ноаниқлиги, бир хил маъноли бўлмаганлиги, бўрттириб юборилиши, яшириб кетилиши, тарқатилиш вақти, жойи ва усулига нисбатан талабларнинг ҳамда қонунчиликда назарда тутилган бошқа талабларнинг бузилиши натижасида рекламадан фойдаланувчиларни чалғитадиган ёки чалғитиши мумкин бўлган) реклама тақиқланган.

Шунингдек, Дин ишлари бўйича қўмитанинг “Ҳалол” сертификати ёки “Ҳалол” ном одатда озиқ-овқат маҳсулотларини тайёрлаш, ишлаб чиқариш, қадоқлаш, сақлаш ва ташиш жараёнларида қўлланилиши, турли реклама ва эълонларида аҳолини чалғитувчи “ҳалол” сўзини қўшиш билан мижозлар сонини кўпайтиришни мақсад қилингани бўйича ҳам умумий хулосаси мавжуд.

Юқоридагиларга кўра, "Halol Bozor" ахборот ресурсини юритувчи шахсларга реклама тўғрисидаги қонунчилик ҳужжатлари талаблари ҳақида тегишли ҳуқуқий тушунтиришлар берилиб, қонунбузилиш ҳолатини келгусида такрорламаслик юзасидан кўрсатма хати киритилди.

Натижада “Halol Bozor” платформаси номи ихтиёрий равишда бошқа номга ўзгартирилиши таъминланди, дейилади қўмита хабарида.