“Билим учун 100 миллион” олимпиадасининг ғолиби аниқланди
Олимпиаданинг 1-ўрин соҳибига 100 миллион сўм, 99 нафар финал иштирокчисининг ҳар бирига эса 1 миллион сўмдан пул мукофоти нақд шаклда топширилди.
Ёшлар ишлари агентлиги томонидан ўтказиладиган “Билим учун 100 миллион” олимпиадасининг бу йилги мавсуми онлайн босқичида қарийб 120 минг ўзбекистонлик иштирок этди.
Онлайн босқичда тўлиқ иштирок этиб, энг юқори ўринни қайд этган ТОП-100 иштирокчи ўртасида 12 декабр куни Тошкент шаҳрида иккинчи босқичи — финал ўтказилди.
Финалда Жаҳонгир Тўраев энг юқори баллни тўплаб, биринчи ўринни қўлга киритди ва 100 миллион сўм пул мукофоти билан тақдирланди. Шунингдек, 99 нафар финал иштирокчисининг барчасига 1 миллион сўмдан мукофот берилди.
Маълумот учун, Жаҳонгир Тўраев — 2002 йил, 26 январда Самарқанд вилоятининг Каттақўрғон шаҳрида туғилган. У бугунгача ўндан зиёд халқаро математика олимпиадалари совриндори ва қатор номдор стипендиялар соҳиби бўлган.
