Ачинарли ҳолат: миллий гербарийни ким қутқаради?
Афсуски, шундай ноёб ашёлар сақланаётган хоналарда ҳаттоки ҳаво совуткич ҳам йўқ.
Ўзбекистонда гербарий (турли ўсимликлардан олинган, қуритилган тур) фонди ва уни сақлаш бўйича шароитлар қандай? Соҳадаги аҳвол ва муаммолар юзасидан "Менинг юртим" телеканали лавҳа тақдим этди.
Гербарийсиз ботаника фани ва ундаги илмий изланишларни тасаввур қилиб бўлмайди.
Журналист Дилдора Абдухалилованинг ҳикоя қилишича, Ўзбекистон миллий гербарийси Марказий Осиёдаги энг йирик коллекцияларни ўзида жамлаган. Унда XVIII асрдан токи ҳозиргача йиғилган 1,5 миллиондан зиёд ўсимлик турлари сақланади.
Афсуски, шундай ноёб ашёлар сақланаётган хоналарда ҳаттоки ҳаво совуткич ҳам йўқ. Намуналар 1927 йилдан қолиб кетган шкафларда сақланади. Лаборатория шароитида сақланиши керак гербарийлар очиқда турибди, бу ерда ходимлар ҳам ишламоқда.
Жаҳон стандартларига кўра, гербарийлар -18 ёки -20 даража совуққача бўлган ҳароратда сақланиши лозим, намлик 45-50 фоизни ташкил этиши лозим.
"Агар гербарий фондимизни йўқотсак, илм-фандаги йирик объектни бой берган бўламиз. Хориж давлатлари фойдаланадиган ўн томлик "Ўрта Осиё аниқлагичи" бизнинг гербарийга асосланиб ёзилган"—дейди Ўзбекистон флораси лабораторияси катта илмий ходими Дилором Тожиддинова.
Лавҳа охирида журналист масъуллардан ушбу соҳага эътибор беришни сўраб мурожаат қилган.