Россиялик юқори мартабали қўмондон қаерда? Кремл жавоб беришдан бош тортмоқда

Россиялик генерал, Украинадаги бирлашган кучлар собиқ қўмондони Сергей Суровикин тақдири ҳануз номаълумлигича қолмоқда.

Аввалроқ, Суровикин қамалгани бўйича хабар тарқалган, кейин бу инкор этилганди.

Сергей Суровикин исёнчи Евгений Пригожин билан яқин алоқада бўлишда гумонланган.

Bloomberg нашрининг ёзишича, ҳарбий прокурорлар генерални Пригожин иши бўйича сўроқ қилган. Нашрга кўра, Суровикин қамалмаган бўлсада, маълум бир жойда ушлаб турилибди.

Яна бир ғарб нашри — Financial Times Суровикин қамалганини иддао қилиб чиққанди. Бунга жавобан генералнинг қизи мурожаат билан чиқиб, отасининг қамалганини тасдиқламаган.

Путиннинг матбуот котиби Дмитрий Песков эса, мавзу юзасидан саволга жавоб беришни истамаган ва Россия мудофаа вазирлигига мурожаат қилиш кераклигини маслаҳат берган.

Эслатиб ўтамиз, Сергей Суровикин 2022 йил октябридан 2023 йил январгача Украинадаги Россия қўшинларини бошқарганди.