Bu yil “Soʻnggi qoʻngʻiroq” qanday oʻtadi?
Maktabgacha va maktab taʼlimi vazirligining “Umumiy oʻrta taʼlim muassasalarida 2022-2023 oʻquv yilini yakunlash va “Soʻnggi qoʻngʻiroq” tadbirlarini oʻtkazish boʻyicha tavsiyalar”i maʼlum boʻldi.
Unga koʻra, umumiy oʻrta taʼlim muassasalarida "Soʻnggi qoʻngʻiroq” tadbirlari 25-may kuni ertalab soat 8:00 dan 9:00ga qadar “Ilmni qadrlang, ilmga intiling!” tashkil etish tavsiya qilindi.
Shuningdek, tadbirni tartibli oʻtkazish va oʻquvchilar xavfsizligini taʼminlash maqsadida oʻquvchilar sonidan kelib chiqqan holda ushbu tadbirga faqatgina 1-, 4-, 9-, 11-sinf oʻquvchilari jalb etiladi.
Tadbir mahalla qoʻmitasi, ota-onalar va huquqni muhofaza qilish idoralari vakillari bilan hamkorlikda yongʻin va texnika xavfsizligi qoidalariga amal qilgan holda oʻtkaziladi hamda maktab hududiga texnika vositalari va begona shaxslarning kiritilmasligi taʼminlanadi.
“Soʻnggi qoʻngʻiroq” tadbirlarini, bosqichli nazorat imtihonlari va yakuniy davlat attestatsiyalarini oʻtkazishda, taʼlim muassasalarini yangi oʻquv yiliga tayyorlash borasida oʻquvchi va bitiruvchilar hamda ularning ota-onalaridan turli xil pul yigʻimlariga yoʻl qoʻyilmaydi.
Bundan tashqari, maktab hayotida faol ishtirok etayotgan oʻquvchilarning ota-onalarini maʼnaviy ragʻbatlantirishga alohida eʼtibor qaratiladi.